Raportimi më i fundit mbi lirinë e medias i ka dhënë Ballkanit një ngjyrë portokalli, ku Maqedonia mban njollën e kuqe, ndërsa Rumania ka lirinë më të madhe në rajon.
Indeksi Botëror për Lirinë e Shtypit 2015 i hartuar nga Reporterët Pa Kufi ka theksuar rënien e lirisë së informacionit për vitin 2014. E sulmuar nga luftërat, kërcënimet në rritje prej elementëve jo-shtetërorë, dhuna gjatë protestave dhe kriza ekonomike, liria e medias është në rënie në të pesta kontinentet.
Dy e treta e 180 vendeve të mbikëqyrura për Indeksin e Lirisë së Botërore të Shtypit dolën më dobët sesa vitin e shkuar. Indeksi botëror që mat nivelin e përgjithshëm të lirisë së informacionit në 180 vende nga viti në vit, është rritur në 3719, pra situata është përkeqësuar.
Ndër vendet e Ballkanit
Rumania mban vendin më të mirë të rajonit, atë të 52-të, e ndjekur nga Kroacia që është renditur në vendin e 58-të.
Shqipëria renditet në vendin e 82-ta në shkallë botërore, me 28.77 pikë krahasuar me pozicionin e 85-të të një viti më parë. Liria e medias në Kosovë është përkeqësuar pasi indeksi e rendit atë në vendin e 87-të, 7 vende më lart sesa një vit më parë.
Serbia është në vendin e 67-të, një rënie nga vendi i 54-të që mbante një vit më parë. Pozicioni i 66-të i Bosnje-Hercegovinës është i pandryshuar.
Megjithatë situata për Maqedoninë nuk duket edhe aq e mirë. Raporti shkruan se në këtë vend gjatë vitit 2014 mbizotëroi keqpërdorimi i legjislacionit për shpifjen dhe alokimi i motivuar politikisht i reklamimit shtetëror.
Mali i Zi është në pozicionin 114-të, ashtu si edhe një vit më parë. Bullgaria si vend i Bashkimit Europian është pozicionuar e 104-ta në raport. Shkak për këtë është bërë Komisioni i Mbikëqyrjes Financiare, një agjenci shtetërore që sipas raportit është kthyer në një polici të medias, e cila gjobit dhe imponon zbulimin e burimeve te gazetarët.
Në shkallë globale, Indeksi Botëror i Lirisë së Shtypit për të pestin vit radhazi ka pozicionuar në vendet e para tre shtetet Skandinave, Finlandën, Norvegjinë dhe Danimarkën. Në anën tjetër të peshores si vendet më të dobëta gjenden Turkmenistani, Koreja e Veriut dhe Eritrea.
Sipas raportit 13 gazetarë janë vrarë në shkallë globale, 8 prej tyre në Francë dhe 5 në Sudanin Jugor, ndërsa 164 janë burgosur.
Me raportim nga Sinisa Jakov Marusic, Shkup.
