Prokuroria e Përgjithshme deklaroi të enjten se ka arrestuar pesë persona dhe ka shpallur dy të tjerë në kërkim, të dyshuar për shpërthimin në farmacinë e babait të ministrit të brendshëm Saimir Tahiri.
“Prokuroria për Krime të Rënda, në vijim të hetimeve të nisura në bazë të materialit të referuar dhe në bashkëpunim me Policinë e Shtetit, ka krijuar dyshime të arsyeshme për përfshirjen e disa personave në aktet e shpërthimit me tritol ose të mbetura në tentativë, ngjarje të ndodhura në datë 10.02.2015 në Tiranë,” thuhet në njoftimin e prokurorisë së përgjithshme.
“Nga hetimet e deritanishme rezulton se këta shtetas, në bashkëpunim midis tyre në formën e grupit të strukturuar kriminal dhe në bashkëpunim me persona të tjerë ende të paidentifikuar, dyshohet se kanë kryer përgatitjen, vendosjen dhe shpërthimin e pajisjeve bombë të telekomanduara me celular në farmacinë e shtetasit B.T, si dhe vendosjen e lëndës shpërthyese në stacionin e autobuzëve në Rrugën “Muhamet Gjollesha,” shtoi ajo.
Kryeministri Edi Rama e pati cilësuar shpërthimin në farmacinë e babait të ministrit Tahiri si një sulm terrorist.
“Akti terrorist ndaj familjes se ministrit të Brendshëm, kafshim monstrash që kanë marrë, po marrin dhe do të marrin atë që meritojnë: Dorën e shtetit në fyt, deri në frymën e tyre të fundit,” u shpreh ai nëpërmjet një deklarate në Facebook.
“Kemi çelur epokën e re të ndarjes së shtetit nga krimi dhe të luftës dinjitoze pa ndalim e as tolerancë të shtetit përballë krimit. Saimir Tahiri është në krye të kësaj lufte dhe kush ka urdhëruar e ekzekutuar terrorin ndaj familjes së tij, duhet ta mësojë se sot i ka dhënë ministrit tonë e të gjithëve ne, një motiv më shumë për të qenë krenarë e të frymëzuar në çdo qelizë, në kryerjen e detyrës së lartë në shërbim të vendit dhe njerëzve të këtij vendi,” Rama shtoi.
