Ministri serb i shëndetësisë mbrojti vendimin për ta transportuar në Beograd foshnjën e sëmurë, pasi helikopteri ushtarak i përdorur për misionin u përplas prej mjegullës së dendur me shtatë persona në bord.
Teksa hetimet vazhdojnë për shkakun e përplasjes vdekjeprurëse, ministri i shëndetësisë Zlatibor Loncar, tha të hënën se ishte e nevojshme të transportohej foshnja në Beograd pasi kishte nevojë të trajtohej në një qendër shëndetësore më të madhe dhe të pajisur më mirë.
Deklarata e tij erdhi pasi publiku dhe media serbe ngritën pyetje rreth arsyes së një helikopteri ushtarak që evakuonte fëmijën nga rajoni jugor i Raskës nuk e çoi fëmijën në një spital në qytetin më të afërt, kur kushtet e motit mund të kishin qenë më të mira për ulje.
“Vlerësimi i doktorëve ishte se fëmija, pesë-ditësh dhe me peshë tre kilogramë, ishte në rrezik vdekje dhe se ndihma duhej t’i ofrohej në një qendër më të madhe ku ishin kushtet e duhura dhe stafi përkatës,” tha Loncar për RTS.
Shtatë persona, përfshirë katër anëtarë, dy mjekë dhe foshnjën 5-ditëshe vdiqën kur helikopteri ushtarak u përplas në aeroportin civil Nikola Tesla pranë Beogradit rreth orës 10:30 të mbrëmjes së të premtes.
Helikopteri rus Mi-17 po transportonte foshnjën me probleme frymëmarrje në kryeqytet për trajtim pasi një ambulancë që po e çonte fëmijën në spital u bllokua prej një rrëshqitje dheu.
Raportimet e para sugjeruan se aeroplani u përplas prej mjegullës së dendur, ndërsa ministria e mbrojtjes konfirmoi se ekuipazhi provoi të ulej dy herë përpara se të zhdukej nga radari dhe të humbte kontaktin me kullën e kontrollit.
Ministria lajmëroi se ka formuar dy komisione të pavarura për të hetuar shkaqet e përplasjes dhe pritet që rezultatet e para të merren të mërkurën.
Ndërkohë, ekspertët ushtarakë, publiku dhe media kanë ngritur pyetje të ndryshme rreth aksidentit, përfshirë përse helikopteri ishte urdhëruar të udhëtonte në mot të keq dhe pse ekuipazhi ishte udhëzuar të ulej në aeroportin civil Nikola Tesla në Beograd prej mjegullës, në vend që të ulej ndokund tjetër.
Fillimisht, të nesërmen e përplasjes, Predrag Bandic, komandant i Brigadës 204 të Aviacionit, i tha gazetarëve se një analizë e kushteve të motit kishte treguar se kushtet më të mira për ulje ishin në Nikola Tesla.
Por Bratislav Gasiç, ministri serb i mbrojtjes, tha një ditë më pas se nuk kishte ende përgjigje pse ky aeroport ishte zgjedhur për t’u ulur.
“Vendi i uljes është zgjedhje e kontrollit të fluturimit dhe vetë pilotit. Deri më tani nuk ka arsye përse piloti u përpoq tre herë të ulej në aeroportin Nikola Tesla kur kishte mundësi të tjera,” tha Gasiç të dielën.
Ushtria gjithashtu deklaroi se helikopteri ishte në gjendjen e duhur dhe se anëtarët e ekuipazhit ishin mes pilotëve më me eksperiencë në ushtri.
