Social Demokratët zbuluan përgjime të reja që ata thonë se provojnë mashtrimet e ndyra të qeverisë me zgjedhjet lokale të 2013 në qytetin e Kumanovës.
Partia opozitare Social Demokrate në Maqedoni, SDSM, prezantoi më tepër përgjime ku thuhet se provohet që zyrtarët qeveritare dhe bashkëpunëtorët e tyre kryen mashtrim në një zgjedhje lokale kyçe.
“Partia në qeveri VMRO DPMNE e kryeministrit Nikola Gruevski kreu një krim klasik zgjedhor. Ata nuk ia dolën dhe nuk do t’ia dalin,” tha Martin Kostovski, lideri i SDSM në Kumanovë në një deklaratë për shtyp në qytetit verilindor.
Përgjimet e prezantuara përshkruanin atë që duket se ishte zëri i ministres së brendshme Gordana Jankuloska, duke diskutuar veprimet e fshehta me ministrat e qeverisë, kolegët e partisë dhe punonjësit e policisë.
Në një përgjim tjetër, sipas opozitës, zëri i Jankuloskës mund të dëgjohet teksa jep instruksione për të shpejtuar pagesën në para të thata 75,000 euro te një lider i një partie të vogël etnike serbe që është pjesë e koalicionit qeverisës maqedonas.
Më vonë Jankuloska dëgjohet teksa diskuton çështjen me sekretarin e përgjithshëm të VMRO DPMNE, Kiril Bozinovski, duke thënë se njerëz të tjerë janë kujdesur për problemin.
“Nuk mund të merrem personalisht me këtë lloj pune bandite. Ndaj çova Dragin,” dëgjohet zëri shpjegues i Jankuloskës. Zëri i Bozinovskit dëgjohet teksa i thotë asaj se ai kishte paguar tashmë 225,000 euro te komunitetet më të vogla etnike.
Në një tjetër përgjim zëri i zv.kryeministrit Vladimir Pesevski nxit Jankuloskën të përdorë policinë për të ndaluar makinat që njihen se transportojnë anëtarë të opozitës në ditën e zgjedhjes dhe me pretekst fals t’i largojë për prova teknike.
“Mund të bëhet por do të ishte një ndërhyrje e ashpër në procesin zgjedhor,” paralajmëron Jankuloska, ku Pesevski përgjigjet “jo, nuk është”.
“Ne kemi të tjera metoda eficente, por kjo nuk është problem. Ne mund t’i ngadalësojmë pak,” pranon ajo më vonë.
Jankuloska tregon më pas se ka dërguar trupa policore në Kumanovë për zgjedhjet dhe se Pesevski ai nuk duhet të shqetësohet.
Kjo ishte konferenca e gjashtëmbëdhjetë për shtyp e opozitës mbi përgjimet e qeverisë në Maqedoni.
Sipas opozitës përgjimet tregojnë se sa i përhapur dhe i mirë-organizuar ishte sistemi i mashtrimit të zgjedhjeve në 2011, 2013 dhe 2014.