Kryeministri i Kosovës, Isa Mustafa, iu bashkua vajtuesve në fshatin Rezallë në një ceremoni varrimi për 28 viktimat e luftës të zhvarrosur vitin e shkuar nga një varr masiv në Serbinë jugore.
Ceremonia e së dielës gjithashtu shënoi 16 vjetorin e vrasjeve të dhjetëra shqiptarëve të Kosovës nga forcat serbe gjatë luftës së Kosovës në 1999 në fshatin Rezallë në veri të vendit në zonën Drenicë.
“Në këtë ditë ne duhet të jemi më të fortë se kurrë tani, edhe më krenar nga ç’kemi qenë, dhe krenar për këta djem dhe vajza që humbën jetën për lirinë e Kosovës që ne gëzojmë sot,” tha për vajtuesit Rifa Jashari, vëllai i një prej komandantëve të parë të Ushtrisë Çlirimtare të Kosovës, Adem Jashari.
Sipas të mbijetuarve, fshati ishte rrethuar në mëngjesin e 5 prillit 1999 nga forcat serbe që menjëherë i nxorën njerëzit nga shtëpitë dhe i dogjën ato.
Disa nga fshatarët u qëlluan në vend, më pas disa ditë më vonë trupat e tyre u zhvendosën dhe ata u listuan si të zhdukur deri vitin e shkuar kur u gjetën në një varr masiv pranë qytetit jugor serb të Rashkës.
Eshtrat e 28 prej viktimave që u gjetën u dorëzuan te familjet e tyre të premten nga misioni i BE për sundimin e ligjit në Kosovë, EULEX.
Eshtrat e 54 personave u rikuperuan gjatë operacionit dy-mujor të zhvarrosjes në Rashkë nga prilli në qershor të vitit të shkuar.
Pesëdhjetë e tre prej tyre janë identifikuar; deri më tani nuk ka pasur përputhje ADN-je për trupin e fundit.
Prokuroria serbe po kryen aktualisht një hetim në Rezallë bashkë me EULEX. Disa dëshmitarë janë marrë në pyetje, por është e panjohur nëse ndonjë i dyshuar është identifikuar nga hetuesit.
Në janar, Qendra Humanitare për Ligjin me bazë në Beograd botoi një raport ku pretendonte se shefi aktual i ushtrisë serbe Ljubisa Dikoviç, si komandant i brigadës 37 të Ushtrisë Jugosllave gjatë konfliktit të Kosovës, ishte përgjegjës për vrasjet dhe zhvendosjen e trupave nga Rezalla.
Dikoviç i ka mohuar akuzat.