Një nga dy rrugët e shpëtimit të nazistëve pas mundjes së tyre në Luftën e Dytë Botërore ishte Argjentina. Sipas disa dokumenteve të siguruara nga prokurorët gjermanë në vitin 2012, rreth 9000 nazistë i janë drejtuar Amerikës Jugore pas Luftës së Dytë Botërore, 5000 prej të cilëve kishin si destinacion Argjentinën. Nëpërmjet rrjetit ODESSA (Organizata e ish-anëtarëve të SS-ve) Nazistët qenë në gjendje t’i shpëtonin ekzekutimeve për krimet çnjerëzore që kishin kryer gjatë regjimit nazist. Në librin e tij “Odessa e vërtetë” kërkuesi argjentinas Uki Goni pretendoi se diplomatët argjentinas dhe zyrtarët e inteligjencës, nën udhëzimet e presidentit Peron kishin inkurajuar kriminelët nazistë dhe fashistë të luftës t’i drejtoheshin Argjentinës. Një provë e gjallë është Ustasha Dinko Šakić, ish-komandant i kampit të përqendrimit Jasenovac i njohur ndryshe si Aushvici i Ballkanit. Sakic kishte jetuar në Argjentinë për më shumë se 50 vjet.
Arkeologët nga Universiteti i Buenos Aires thonë se ndërtesat e rrënuara në një rezervë natyrore argjentinase mund të kenë qenë planifikuar si një vend i fshehtë për zyrtarët e lartë nazistë në periudhën e Luftës së Dytë Botërore. Daniel Schavelzon që drejton qendrën e arkeologjisë urbane në Universitetin e Buenos Aires dhe që drejton skuadrën kërkimore në zonë, tha se ndërtesat që ata zbuluan ishin dukshëm të projektuara si një vend për t’u fshehur, por nazistët nuk jetuan kurrë atje pasi e kuptuan se mund të jetonin më rehat dhe në fshehtësi në qytete.
Gjatë kërkimit është gjetur gjithashtu një monedhë gjermane në rrënojat e një shtëpie të ndërtuar brenda parkut Teyu Cuare, pranë San Ignacio në provincën verilindore të Misiones, Argjentinë.