Avokati i kryebashkiakut të Kamzës aludon për dënim për arsye politike të ndërmarrë “jashtë gjykatës”.
Kryebashkiaku aktual i Bashkisë Kamëz Xhelal Mziu, i cili vetëm dy ditë më parë siguroi mbështetjen e Partisë Demokratike për rikandidim, u dënua sot nga gjykata e shkallës së parë në Tiranë me dy vjet heqje lirie dhe me dy vjet ndalim nga mbajtja e posteve publike për akuza që lidhen me abuzim me pushtetin dhe vendosje taksash të paligjshme.
Mziu, 46 vjeç, i lindur në Dibër dhe banues në Tiranë, qe vënë në ndjekje penale në dhjetor të vitit 2013 për veprat penale të “Shpërdorimit të detyrës” dhe “Shkeljes së barazisë së pjesëmarrësve në tendera dhe ankande publike”.
Çështja ndaj tij nisi pasi një kompani pjesëmarrëse në një tender për ndërtim rruge pati dorëzuar kallëzim në prokurori për shkelje të barazisë në tenderë.
Ai qe arrestuar shkurtimisht në atë kohë dhe qe ndjekur në gjendje të lirë.
Vendimi i dënimit nuk është i formës së prerë. Sipas avokatit të tij Genc Gjokutaj, vendimi i dënimit do të apelohet. Kjo nuk pritet të pengojë Mziun të rikandidojë për bashkinë e Kamzës, e cila pas reformës territoriale përfshin edhe Komunën e Paskuqanit.
Një investigim i mëparshëm i BIRN zbuloi se Bashkia Kamëz kishte shpenzuar mijëra euro për çmime të lëshuara nga dy kompani, me qendër në Zvicër dhe Angli, të cilat akordojnë çmime për institucione dhe kompanitë publike të vendeve në zhvillim në këmbim të parave.
Bashkia e Kamzës sipas Censusit të vitit 2011 numëron një popullsi prej 104.190 banorësh. Ndërkohë që sipas Regjistrit Civil kjo bashki numëron 125.632 banorë në një sipërfaqe prej 37.18 km2 me një densitet prej 3379.02 banorë/km2.
