Ish-presidenti thotë se ai ra dakord të lejonte CIA-n të ngrinte një bazë në Rumani, por nuk kishte idenë se përfshinte edhe një burg.
Ish-presidenti i Rumanisë, Ion Iljesku, ka thënë në një intervistë për gazetën gjermane Der Spiegel se midis vitit 2002 dhe 2003 ai miratoi në parim një kërkesë të SHBA që CIA të ngrinte një bazë në Rumani.
Megjithatë, ai tha se nuk e dinte se përfshinte një njësi paraburgimi sepse Ioan Talpes, kreu i administratës presidenciale të kohës, u mor me detajet e projektit.
“Mendova se ishte një gjest i mirë përpara se t’i bashkoheshim NATO-s,” tha Iliescu, sipas raportimeve të medias.
Në vitin 2014, pas vitesh mohim, Talpes pranoi se agjencia rumune e inteligjencës lejoi SHBA-në të hapte një ose dy qendra izolimi në vend. Ai e lidhi këtë veprim me bashkëpunimin përpara anëtarësimit të Rumanisë në NATO.
Kryeministri Viktor Ponta tha në dhjetor se ai ishte gati të bënte publike të gjitha informacionet rreth përfshirjes së pretenduar të Rumanisë me programet e izolimit dhe marrjes në pyetje të CIA-s, pasi qeveria e tij më herët këmbënguli se nuk kishte prova të ekzistencës së tyre.
“Ne kemi detyrën të informojmë publikun për çdo gjë që dimë rreth të shkuarës. Qeveria do të paraqesë të gjithë informacionin nga arkivat për të ndihmuar zyrën e prokurorit, parlamentin apo median të zbulojë çfarë ndodhi,” tha Ponta. Asgjë nuk ka ndodhur që atëherë.
Senati amerikan dhjetorin e shkuar publikoi një dokument të redaktuar mirë prej 500 faqesh që tregonin metodat dhe detajet e praktikave që CIA përdori për të marrë informacion sekret nga terroristët e dyshuar pas sulmeve të 11 shtatorit në Nju Jork.
Raporti zbuloi teknikat brutale të marrjes në pyetje të përdorura në burgjet sekrete kudo nëpër botë, përfshirë Rumaninë.
Raporti gjithashtu kishte referenca për Zonën e Zezë të Izolimit, që ishte emri i koduar për ndërtesën në Bukuresht.
Rumania e ka mohuar vazhdimisht përfshirjen në qendrat sekrete të CIA-s, duke thënë se nuk kishte burime të besueshme.
Autoritetet e Bukureshtit iu përmbajtën hetimeve parlamentare nga 2005-2008 që thoshin se nuk kishte prova për shkelje.