Më shumë se 100 fëmijë nga disa kopshte të Sarajevës morën ndihmë mjekësore dhe rreth 30 të tjerë u shtruan në spital në një nga rastet më të mëdha të helmimit në Bosnje.
Spitalet e Sarajevës u mbushën nga fëmijët që shfaqën simptoma të helmimit nga ushqimi gjatë dy ditëve të shkuara, duke shkaktuar panik mes prindërve në kryeqytetin boshnjak.
“Situata është kritike në Qendrën Klinike të Sarajevës,” raportoi portali i lajmeve Depo.ba.
Të premten, Qendra kryesore Klinike e Sarajevës raportoi se 121 fëmijë kishin marrë ndihmë mjekësore dhe 35 prej tyre ishin shtruar për trajtim ose përkujdes shtesë.
Të gjithë ata shfaqën simptoma të lidhura me ushqimin e helmuar, përfshirë diarre, të vjella, temperaturë të lartë trupi dhe dobësi, pavarësisht se askush nuk është në gjendje kritike për jetën, thanë doktorët.
Klinika Qendrore e Sarajevës konfirmoi se ne një numër rastesh shkaku i sëmundjes u identifikua të ishte salmonela – shkaktuar prej bakterit që gjendet shpesh në ushqimin e prishur.
Të gjithë fëmijët e sëmurë ishin të regjistruar në katër kopshte publike të lokalizuara në Sarajevë. Ministria arsimore kantonale e Sarajevës dhe institucioni i menaxhimit publik Fëmijët e Sarajevës, COS, që janë në krye të këtyre kopshteve, thanë se inspektime higjiene janë dërguar në ndërtesat e dyshuara si dhe në kuzhinën qendrore ku ushqimi u dërgua për analiza.
