Një plan i qeverisë për të dhënë me qira një kala te një firmë zvicerane për ta kthyer në hotel, nuk e ka marrë mbështetjen e një komiteti parlamentar në Malin e Zi.
Një komitet parlamentar refuzoi të mërkurën të mbështesë planet qeveritare për të dhënë me qira ishullin e Lastavicës dhe kalanë Mamula në Kotorr, të cilën partitë opozitare e quajtën një marrëveshje të korruptuar.
Propozimi për t’ia ofruar kalanë austro-hungareze një firme private për ta kthyer në një kompleks turistik luksi mori mbështetjen e partisë së Social Demokratëve në qeveri. Megjithatë, opozita, që në seancën e së mërkurën kishte shumicë, votoi kundër idesë.
Deputeti i opozitës Nebojsa Medojeviç akuzoi qeverinë për ‘dhurim të një pjese territori të Malit të Zi’ te të huajt për të ndërtuar vila private.
“Një marrëveshje e tillë ka të gjitha elementet e korrupsionit dhe shpallja e çdo të huaji si një investitor strategjik na ka kushtuar tashmë shumë,” tha Medojeviç.
Pas nëntë muajsh negociata, ministri i turizmit, Branimir Gvozdenovic dhe kryetari i kompanisë Orascom me bazë në Zvicër nënshkruan një kontratë për qiradhënien afatgjatë të ishullit, përfshirë fortesën.
Kontrata ishte për 49 vjet dhe përfshinte një obligim prej Orascom që të investonte 15 milionë euro gjatë viteve të ardhshme. Kompania zvicerane planifikoni të rikonstruktonte fortesën Mamula si hotel me pesë hyje me 23 dhoma me spa, marinë luksoze, vend për uljen e helikopterëve, pishinë dhe kazino.
Nën ligjin malazez, kontrata të tilla duhet të marrin aprovim paraprak nga parlamenti.
Fortesa në ishullin Lastavica, e lokalizuar në hyrje të Gjirit të Kotorrit, pranë rezortit bregdetar të Herceg Novi, është ndërtuar nga Austro-Hungaria në shekullin e 19. Është përdorur kryesisht si një burg gjatë luftërave botërore.
Për vite, fortesa shërbeu si një monument kulture, duke tërhequr mijëra vizitorë çdo verë.
Disa organizata mjedisore dhe një lidhje e qytetarëve e ka kritikuar planin për qiradhënien e monumentit historik.
Lidhja Boka tha se askush nuk ishte kundër rikonstruktimit dhe promovimit si një kompleks përkujtimor, ku më shumë se 2000 vendas u burgosën gjatë Luftës së Dytë Botërore, por ishte kundër planeve për ta kthyer fortesën në një hotel me një kazino.
Në verën e vitit 2014, mijëra njerëz nga zonat bregdetare të Malit të Zi protestuan për disa ditë pasi u zbulua plani i qiradhënies së fortesës.