Qeveria kroate ka paralajmëruar largimin e krerëve të agjencisë shtetërore që urdhëruan fshehjen e deklarimeve të pasurisë nga publiku.
Duke shprehur pakënaqësinë në rritje për mënyrën se si çështja po trajtohet, qeveria kroate të enjten tha se do të largonte kryesinë e agjencisë për mbrojtjen e të dhënave personale, AZOP, pas vendimit të saj për të fshirë deklaratat e pasurive të zyrtarëve nga uebsajti.
Qeveria do të marrë vendimin për largimin e drejtorit të AZOP, Ante Rajkovaca dhe zëdhënëses Dubravka Dolenc, me votim në parlament, aty ku koalicioni qeverisës ka një shumicë.
Vendimi pason atë të AZOP për të hequr të ashtuquajturat letra pronësie – deklaratat e pronësisë – nga uebsajti i komisionit parlamentar për zgjidhjen e konflikteve të interesit me justifikimin se publikimi i të dhënave shkelte aktin e mbrojtjes së të dhënave personale.
Me zgjedhjet parlamentare në fund të këtij viti ose në fillim të 2016, lëvizja u interpretua si një mbulim i konflikteve të mundshme të interesit ose si prona të fituara ilegalisht nga zyrtarët qeveritarë.
Duke iu adresuar spekulimit të medias për çështjen, ministri i administratës shtetërore Arsen Bauk foli për median pas seance parlamentare të enjten mbrëma.
“Ky është vetëm konfirmim i faktit se qeveria nuk është pas vendimit mbi ndryshimet e të dhënave të lejuara për publikim dhe tërheqjes së deklaratave,” tha Bauk.
Për më tepër, anëtarë të Partisë qeverisëse Social Demokrate, SDP, në parlament hoqën një amendament të ligjit për mbrojtjen e të dhënave personale.
Amendamenti, që do të nxirret për votim përpara pushimeve të verës, udhëron që rregullimet e mbrojtjes së të dhënave të mos mbulojnë zyrtarë publik në të ardhmen.
Kryetarja e komisionit për konfliktin e interesit, Dalija Oreskoviç, të martën tha se komisioni synonte të ngrinte një padi ndaj AZOP për vendimin e marrë.
Ajo tha se heqja e të dhënave nga deklaratat e pasurisë kishte pakësuar vlerën e tyre, meqënëse këto të dhëna ndihmonin njerëzit të identifikonin kur të ardhurat e zyrtarëve nuk përputheshin me fitimet ligjore gjatë mandateve dhe gjithashtu zbulonin konflikte të mundshme interesi.
Sipas ligjit, të gjithë anëtarët e parlamentit dhe qeverisë si dhe disa zyrtarë të tjerë duhet të paraqesin deklarim pasurie, të listojnë të gjitha pronat, obligimet financiare, kreditë dhe rrogat.
Deklaratat dorëzohen kur zyrtarët marrin postin dhe kur u mbaron mandati. Kështu, publiku mund të kuptojë nëse politikanët kanë fituar para gjatë shërbimit në institucione shtetërore.
