Qeveria e lodhur e Gruevskit kryen disa zëvendësime pasi ministrat e brendshëm dhe të transportit si dhe kreu u policisë sekrete – që të tre të përfshirë në skandalin e përgjimeve – dhanë dorëheqjen të martën në darkë.
Ministrja e Brendshme Gordana Jankuloska dhe ministri i Transportit Mile Janakieski dhanë dorëheqjen të martën në darkë bashkë me Saso Mijalkov, shef i policisë sekrete. Një njoftim për shtyp tha se kryeministri Niloka Gruevski e ka pranuar dorëheqjen e tyre dhe ka propozuar ministrat e rinj në parlament.
Dorëheqja e tri figurave kyçe të qeverisë së tij vjen në një kohë krize të thellë politike të lidhur me pretendimet e opozitës së kryeministri Gruevski dhe kushëriri i tij, shefi i shërbimeve sekrete Mijalkov, kanë urdhëruar mbikëqyrjen e paligjshme të rreth 20 mijë njerëzve përfshirë shumë ministrave.
Që nga shkurti opozita ka qenë duke publikuar bisedat e përgjuara që duket se tregojnë se qeveria është përfshirë në një numër të madh shkeljesh dhe hilesh politike, përfshirë manipulimin e votave, abuzimin me sistemin e drejtësisë dhe fshehjen e vrasjes së një të riu nga një oficer policie.
Në shumë nga përgjimet inkriminuese, të tri zyrtarët duket se janë bashkëbiseduesit kryesorë.
“Shpresoj që dorëheqja ime të ndihmojë në zgjidhjen e krizës së imponuar nga opozita me sjelljen e saj anti-shtet,” shkroi me fodullëk Mijalkov në letrën e dorëheqjes.
Të tre qenë mes bashkëpunëtorëve më të ngushtë të Gruevskit dhe mbanin pozicionet e tyre që kur Gruevski mori pushtetin në vitin 2006.
Dorëheqja e Jankulovskës pasoi edhe fundjavën dramatike të dy ditëve të luftimeve mes forcave të policisë dhe një grupi të armatosur në Kumanovë. Tetë oficerë policie u vranë dhe 37 të tjerë u plagosën. Maqedonia ka deklaruar se janë vrarë edhe 14 anëtarë të grupimit të armatosur shqiptar.
“Në këto kohë të vështira, kur Maqedonia gjendet në krizë të thellë politike, është koha që unë të dorëhiqem, gjë që unë shpresoj se do të ndihmojë në zgjidhjen e krizës,” shkroi Jankuloska.
Ministri i ri i propozuar i brendshëm është Mitko Cavkov, kreu aktual i Byrosë së Sigurisë Publike ndërsa ministri i ri i transportit i propozuar është Vlado Misajlovski, kreu i autoritetit rrugor të Maqedonisë.
Ndryshimet në qeverisje pritet të kryhen shpejt në një seancë parlamentare të përcaktuar për të mërkurën.
“Nuk ka kohë për triumfalizëm. Dorëheqjet e Jankuloska, Janakieski dhe Mijalkov nuk janë objektivat tona finale. Ky është vetëm një hap përpara drejt fundit të Nikola Gruevskit,” komentoi në Facebook kreu i opozitës socialdemokrate Zoran Zaev.
Ndërsa thirrjet për dorëheqjen e qeverisë Gruevski vijojnë të shtohen, socialdemokratët kanë planifikuar një protestë të madhe kundër qeverisë më 17 maj.
Ata kanë kërkuar dorëheqjen e të gjithë qeverisë për shkak të shkeljeve të rënda të zbuluara nga përgjimet.
