Komuniteti LGBT kërkon mbajtjen e premtimeve për ndërgjegjësimin e shoqërisë dhe ligjërimin e bashkëjetesës mes gjinive të njëjta.
Dhjetëra persona të komunitetit LGBT dhe mbështetës të tyre u mblodhën për të katërtin vit radhazi për të pedaluar paqësisht për më shumë të drejta dhe për të shprehur mbështetjen për të rinjtë që përzihen nga shtëpia prej seksualitetit të tyre.
“Para katër vjetësh kemi qenë vetëm 12 vetë që sfiduan gjithçka, sot jemi shumë herë më shumë. Ne sot protestojmë për ata që nuk kanë mundësi që të vijnë këtu,” tha gjatë paradës Kristi Pinderi, drejtor i ProLGBT.
Me flamuj të këtij komuniteti dhe me pankarta si “Asnjë dashuri nuk është gabim” dhe “Duam të drejta të barabarta dhe jo drejta të veçanta”, të shoqëruar gjithashtu nga avokati i popullit dhe ambasadori amerikan Donald Lu, lëvizën në rrugët e kryeqyteti në praninë e madhe të policisë.
“Shoqëria shqiptare ka një homofobi shumë të theksuar, por gjithashtu shumë artificiale. Njerëzit mendojnë se duhet të jenë kundër LGBT për të qenë në krahun e duhur të turmës dhe jo sepse e ndjejnë vërtetë këtë,” tha për BIRN Erjon Tela pranë ProLGBT.
Megjithatë avokati i popullit Igli Totozani i bëri thirrje komunitetit për optimizëm. “Personat pjesëmarrës në paradë janë rritur nga viti në vit, gjithashtu edhe numri i qytetarëve që kuptojnë se të drejtat vlejnë për të gjithë njerëzit”, tha Totozani.
Premtimet e pambajtura të vitit 2013 për ndërgjegjësimin e shoqërisë janë ato që kanë shkaktuar pakënaqësi ndër personat e këtij komuniteti. Njohja e ligjshme e bashkëjetesave mes të njëjtës gjini dhe dhuna e padrejtësitë në familje, shkollë, punësim dhe çdo ambient tjetër, qe një tjetër çështje e ngritur.
Por gjithnjë e më shumë persona të komunitetit kanë marrë guximin të dalin hapur në paradë ose të flasin për median.
“Vitet e tjera ka pasur më shumë mbështetës sesa persona që i përkasin LGBT. Këtë vit ka më tepër njerëz që kanë dalë hapur,” tha për BIRN Vasilika Laçi Civil Rights Defenders.
“Autoritetet duhet të tregojnë haptazi mbështetjen e tyre, jo vetëm si premtime përpara zgjedhjeve, por me veprime konkrete të ndërgjegjësimit të shoqërisë për sjelljen e duhur me komunitetin LGBT” shtoi Laçi.
Statistikat për përqindjen e personave të komunitetit LGBT në raport me popullatën në përgjithësi mungojnë në Shqipëri.
