Kompania kroate “Adris Group” ia ka shitur degën e saj, “Tobacco Factory Rovinj”, TDR, “British American Tobacco”, BAT, për 505 milion euro.
Një prej kompanive më të mëdha në Kroaci, “Adris Group”, ditën e hënë tha se ajo ia ka shitur degën e saj, “Tobacco Factory Rovinj”, TDR, “British American Tobacco”, BAT, për 505 milion euro.
Adris u bë kohë që kishte planifikuar ta shiste TDR-në, kompaninë lidere në Kroaci dhe rajon për produktet e duhanit. Marrëveshja me BAT u nënshkrua të shtunën në selinë e saj në Londër.
Përveç TDR-së, BAT ka blerë të gjitha kompanitë në sektorin e duhanit të “Adris Group”, të cilat ndihmojnë me prodhimin e produkteve të duhanit dhe shpërndarjen e tyre.
BAT ka rënë dakord ta mbajë prodhimin e produkteve të duhanit për pesë vjet në Kanfanar pranë Rovinjit, në gadishullin e Istrias perëndimore.
Konfirmimi përfundimtar do të jepet nga këshilli i aksionerëve të kompanisë dhe bordi mbikëqyrës i TDR-së në korrik.
Kryetari i bordit ekzekutiv të TDR-së, Mato Zadro, shprehu kënaqësinë për marrëveshje dhe për gjetjen e një “kompanie të shquar” për këtë blerje.
“Për të gjithë ne, është e rëndësishme që prodhimi në Kanfanar do të vazdhojë dhe se do të ruhen vendet e punës,” përfundoi ai.
“Adris Group” e ka shitur kështu të gjithë industrinë e saj të duhanit, duke iu drejtuar kështu vetëm industrisë së turizmit, ushqimit dhe sigurimeve. Kompania ka investuar 400 milion euro në kompaninë e saj të hoteleve Maistra dhe planifikon të investojë edhe 225 milion euro të tjera deri në vitin 2017.
Kompania e saj e kultivimit të peshkut, Cromaris, është shndërruar në një nga dhjetë më të mëdhatë në llojin e saj në botë. Përveç kësaj, vitin e kaluar “Adris Group” bleu aksionet e Kroacisë në kompanitë më të mëdha kroate të sigurimeve, “Croatia Insurance”.
Duke u luftuar me konkurrencë më fortë në vitet e fundit, TDR mbajti 57 për qind të aksioneve të tregut kroat në vitin 2014, 30 për qind në Bosnjë dhe Hercegovinë dhe 11 për qind në Serbi.
TDR shiti 8.7 miliard cigare në vitin 2014, nga të cilat 67 për qind u eksportuan në vendet e ish-Jugosllavisë dhe disa në vendet e BE-së. Të ardhurat e saj operative në vitin 2014 ishin 25.7 milion euro.
Një kompani shumëkombëshe, BAT, është një nga pesë kompanitë më të mëdha të duhanit, me pozicione kryesore në 50 vende dhe operon në rreth 180 vende. Në vitin 2014, BAT fitoi 4.7 miliard euro në të ardhurat neto.
Deri në vitin 2005, BAT kishte konkurruar në tregun kroat, por u tërhoq për shkak të mungesës së fitimeve.
Kompania e shikon si shumë të rëndësishëm zgjerimin e saj në tregun e Ballkanit duke pasur parasysh nivelet e larta të konsumit të duhanit në rajon. Ndërsa në Britani vetëm pak më shumë se 20 për qind e të rriturve pinë duhan, shifrat përkatëse për Serbinë, Kroacinë dhe Bosnjën janë rreth 30 për qind për femrat dhe 40 për qind për meshkujt.
