Në mes të përpjekjeve ndërkombëtare për të zgjidhur tensionin politik të Maqedonisë, kundërshtarët e kryeministrit Gruevski kanë lajmëruar protesta të tjera për kërkimin e dorëheqjes së tij.
Një lëvizje e quajtur “Protestiram” [“Unë protestoj”] rifilloi marshimet e përditshme të protestave të premten, një muaj pasi policia largoi protestuesit përpara ndërtesës së qeverisë.
Më 5 maj, policia speciale përdori forcën për të shpërndarë një protestë antiqeveritare ku mijëra njerëz kërkuan dorëheqjen e menjëhershme të kryeministrit Gruevski. Protesta ndodhi pasi opozita publikoi përgjime që shfaqnin zyrtarët teksa përpiqeshin të mbulonin të vërtetën rreth vrasjes së një të riu të quajtur Martin Neshovski në 2011.
“I bëjmë thirrje kujtdo të na bashkohet që të vazhdojmë ndërtimin e një lëvizje masive civile që kërkon demokratizimin institucional në Maqedoni. Ky proces nuk duhet të bëhet me biseda mes partive politike por duhet të jetë i hapur për të gjithë,” tha Artan Sadiku, nga lëvizja Protestiram.
Ai këmbënguli se lëvizja, e përbërë kryesisht nga aktivistë të shoqërisë civile, nuk është një front për opozitën.
“Kriza politike në Maqedoni nuk është rezultat i përballjes së dy partive politike por një revoltë qytetarë kundër klikës kriminale në pushtet dhe sistemit politik të korruptuar që i ka shkelur të drejtat dhe i ka bërë qytetarët të ndihen të kërcënuar në vendin e tyre,” shtoi Sadiku.
Vrasja e Martin Neskovskit do të shënohet edhe nga një protestë tjetër që do të mbahet të shtunën.
Një simpatizant i partisë qeverisëse, Neskovski u rrah për vdekje natën që VMRO DPMNE festoi fitoren zgjedhore më 6 qershor 2011.
Vrasja iu atribua një oficeri policie që më vonë u dënua, nxiti protesta rreth brutalitetit të policisë, protesta që zgjatën dy muaj.
Ndërkohë, një tjetër rast polemik i quajtur “Monstra” nga autoritetet, në të cilin gjashtë shqiptarë etnikë u burgosën përjetë për vrasjen e pesë peshkatarëve, po nxit protesta antiqeveritare.
Një lëvizje politike shqiptare e quajtur “Besa” ka planifikuar një marshim në Shkup për 13 qershor për të kërkuar dorëheqjen e qeverisë dhe përgjegjësi nga ministrat shqiptarë etnik prej partisë BDI.
“Ne kërkojmë dorëheqjen e qeverisë së Nikola Gruevskit dhe Ali Ahmetit, për shkak të kthimit të vendit në partiak, keqpërdorim të institucioneve, dështimit për procesin e integrimit dhe politikat anti-shqiptare”, tha kryetari i lëvizjes “Besa”, Bilal Kasami.
Ai i bëri thirrje Zaevit që të publikonte përgjimet për këto çështje. Ky i fundit ka pretenduar se ka biseda të dyshimta të zyrtarëve për vrasjet e maqedonasve, por shtoi se ai nuk po i publikonte ende përgjimet nga frika e reagimit të dhunshëm.
Lideri i opozitës, Zoran Zaev lajmëroi të premten se pas komenteve të Komisionerit Hahn në Uashington rreth zgjedhjeve të mëparshme në Maqedoni, partia opozitare e Social Demokratëve nuk do të marrë pjesë në bisedimet në Bruksel më 10 qershor. Ai kritikoi komentet e Hahn rreth “raporteve përgjithësisht pozitive të misionit monitorues OSBE/ODIHR për zgjedhjet e mbajtura në Maqedoni.
Negociatat janë një përpjekje për të zgjidhur krizën e thellë politike pas pretendimeve për mbikëqyrje masive në Maqedoni.