Ditët e fundit është shtuar dyndja për në Itali dhe më pas në vendet e zhvilluara të BE-së e refugjatëve nga Afrika e Veriut dhe nga Siria. Fotografi Ervin Shulku tregon për gjendjen e mjeruar të refugjatëve që mblidhen në stacionin e trenit të Milanos me shpresën për t’u larguar drejt Gjermanisë, Francës, Belgjikës dhe vendeve skandinave. Shumica e tyre vijnë nga Siria, Eritrea dhe Etiopia. Ata udhëtojnë si familje pasi mblidhen në Libi dhe që aty udhëtojnë me varka ose motoskaf drejt Italisë. Në Itali ekzistojnë disa shoqata humanitare që i japin ndihmën e parë, por gjendja në shtetin fqinj është bërë e një niveli alarmant pasi shtete si Franca dhe Austria po i kthejnë refugjatët përsëri në Itali. Ditët e fundit fluksi i refugjatëve në vend ka qenë 200-300 çdo ditë, gjë që e ka detyruar bashkinë e Milanos të hapë disa kapanone për t’i strehuar, raporton Shulku.
