Lideri i partisë politike dhe ish-kryeministri Ramush Haradinaj u ndalua nga autoritetet në Slloveni me një urdhër arresti nga Serbia për krime lufte gjatë konfliktit të viteve 1998-1999 në Kosovë.
Haradinaj u ndalua nga autoritetet ditën e mërkurë në aeroportin e Lubjanës mbi pretendimet serbe se kryer krime gjatë kohës që ishte komandant në Ushtrinë Çlirimtare të Kosovës gjatë kohës së luftës.
Ish-kryeministri, i cili tani është kryetari i partisë Aleanca për Ardhmërinë e Kosovës, tha për BIRN në linjë telefonike se autoritetet sllovene e kishin “katranosur punën” duke e ndaluar atë për urdhër arrestin e vitit 2004, i cili ai këmbëngul se nuk është i vlefshëm.
“Nuk e shikoj si një ofendim personal, por si një ofendim për Kosovën,” tha Haradinaj.
“Që prej vitit 2012 kam udhëtuar në shumë vende, përfshirë edhe Shtetet e Bashkuara dhe vende evropiane dhe nuk kam pasur probleme,” shtoi ai.
Ai u shpreh se i është thënë të dalë para një gjykate sllovene në orën 18:00 me orën vendase “për të sqaruar gjërat”.
Partia e tij Aleanca për Ardhmërinë e Kosovës tha se ndalimi i tij ishte një përpjekje “për të shpifur ndaj Haradinajt dhe personalitetit të tij” dhe bëri thirrje për lirimin e menjëhershëm të tij.
Prokuroria serbe e krimeve të luftës aktualisht po e heton Haradinaj në tre çështje, duke e akuzuar atë për vrasjen e të paktën 60 njerëzve.
Haradinaj është cituar gjithashtu nga mediat kosovare se është shprehur që urdhër arresti bazohej në akuza të rreme.
“Gjatë këtij udhëtimi kam kaluar në disa aeroporte dhe gjithçka shkoi mirë. Ata (sllovenët) janë si ata (serbët) – ata janë vëllezërit e tyre,” tha ai në një deklaratë, sipas gazetës kosovare “Koha Ditore”.
Ish-komandant i UÇK-së u lirua nga akuzat në vitin 2012 nga Gjykata e Hagës për krime lufte gjatë konfliktit të vitit 1998-1999.
Gjykata e mbështetur nga OKB-ja hodhi poshtë akuzat se ai ishte pjesë e një sipërmarrje të përbashkët kriminale për të vendosur kontrollin e UÇK-së në Kosovën perëndimore nëpërmjet kampeve të burgimit, dhe se ai dhe të tjerë ishin përgjegjës për torturimin dhe vrasjen e serbëve dhe shqiptarëve që besohej se bashkëpunonin me serbët.
Ai tha se në atë kohë “drejtësia ndërkombëtare konfirmoi se rruga jonë drejt lirisë ishte e pastër dhe e drejtë”. Megjithatë, Serbia u shpreh se lirimi nga akuzat ishte i padrejtë dhe se gjyqi kishte të meta për shkak të problemeve me dëshmitarët.
Haradinaj, 46 vjeç, ka qenë kryeministër i Kosovës për 100 ditë nga dhjetori i vitit 2004 deri në mars të vitit 2005, para se të dorëzohej me dëshirën e tij në Gjykatën Penale Ndërkombëtare për ish-Jugosllavinë.
I njohur me pseudonimin ‘Rambo’, ai konsiderohet nga shumë njerëz në Kosovë si një hero i luftës kundër regjimit serb të Sllobodan Millosheviçit.