Ish-komandanti i kthyer në lider politik Ramush Haradinaj, i cili u ndalua në Slloveni në bazë të një urdhër arresti serb për krime lufte, pritet të kthehet në Kosovë pasi u lirua.
Ish-kryeministri Haradinaj u lirua nga një gjykatë sllovene ditën e premte, pasi u ndalua bazuar në një urdhër arresti nga Serbia, e cila e akuzonte atë për krime lufte gjatë kohës që ai ishte komandant i Ushtrisë Çlirimtare të Kosovës gjatë konfliktit të vitit 1998-1999 me forcat e Beogradit.
“Ambasada e Kosovës në Lubjanë … na dërgoi një shënim diplomatik duke konfirmuar se qytetari i Kosovës po kalonte në Slloveni ndërsa kthehej nga një mision i posaçëm diplomatik jashtë vendit, e cila është edhe arsyeja pse Sllovenia duhet ta lërë atë të kalojë i lirë,” tha gjykata në Kranj në një deklaratë për agjencinë e lajmeve Reuters.
Politikani tani pritet të kthehet në Prishtinë, tha se Aleanca për Ardhmërinë e Kosovës, partia që ai drejton tani.
Në vitin 2012, Haradinaj u lirua nga akuzat për krime lufte nga Gjykata e Hagës. Por prokuroria serbe për krime lufte aktualisht po e heton atë në tri çështje, duke e akuzuar atë për vrasjen e të paktën 60 njerëzve.
Arrestimi i Haradinaj, u cili ka qenë për pak kohë kryeministër në vitet 2004-2005, ka zemëruar shumë njerëz në Kosovë, të cilët e konsiderojnë atë një hero për rolin e tij në luftën kundër forcave serbe.
Protestuesit u mblodhën për ditën e tretë me radhë para Ambasadës Sllovene ditën e premte në mëngjes, duke mbajtur pankarta me slogane si “Trup Sllovenisë!” Disa nga mbshtetësit e Haradinajt e kaluan natën jashtë ambasadës.
Haradinaj ditën e premte falënderoi njerëzit në Kosovë për mbështetjen e tyre.
“Dua të falënderoj të gjithë ata që u bashkuan në këtë situatë të vështirë,” shkroi ai në Facebook.
Ministria sllovene e drejtësisë vendosi ditën e enjte se ai nuk do të ekstradohet në Serbi, pavarësisht se çfarë vendos gjykata sllovene në lidhje me urdhër arrestin e Beogradit.
“Është shumë e rëndësishme që ministri i drejtësisë ka vendosur të mos lejojë ekstradimin e Haradinajt, edhe nëse gjykata e merr një vendim të tillë. Kjo është sepse të gjitha akuzat në urdhër arrest janë adresuar nga ana e Gjykatës së Hagës,” tha ministri i jashtëm slloven Karl Erjavec.
Haradinaj ka këmbëngulur se urdhër arresti i vitit 2004 nuk është i vlefshëm.
Parlamenti i Kosovës ndërkohë miratoi një rezolutë ditën e enjte duke bërë thirrje për lirimin e menjëhershëm të Haradinajt dhe kthimin e tij në Kosovë.
Parlamenti gjithashtu vendosi të dërgojë një notë proteste në Lubjanë, një lëvizje që shihet si e diskutueshme në një kohë që Kosova gëzon marrëdhënie të mira me Slloveninë.
Ministri i Jashtëm Hashim Thaçi i bëri thirrje parlamentarëve ta rimendojnë këtë gjë, duke thënë se “problemi është në Beograd, jo në Lubjanë”.
Ndërkohë, mbështetës të klubit të basketbollit të Prishtinës, Plisat, hodhën shashka në ambientet e kompanive sllovene në Prishtinë të enjten, duke thënë se ata donin të digjnin “gjithçka që është sllovene”.
Albert Kastrati, kreu i Plisat, tha se “kjo do të vazhdojë derisa Ramushi të lirohet”.
Sulmet u kritikuan nga presidentja Atifete Jahjaga.
Ka pasur gjtihashtu reagime të forta në media sociale, me njerëz që postojnë fotot e kartave bankare të djegura të bankës “Ljubljanska Banka” dhe qumështin “Alpsko” të derdhur, duke bërë thirrje për një bojkotim të produkteve të tilla sllovene.
