Kryeministri Nikola Gruevski tha në një fjalim në 25-vjetorin e partisë së tij se do t’i fitojë zgjedhjet e ardhshme në Maqedoni.
Përpara bisedimeve thelbësore me opozitën për të nxjerrë vendin nga kriza, kryeministri maqedonas Gruevski mbajti një fjalim sfidues ndaj mbështetësve të partisë së tij VMRO DPMNE të shtunën në të cilin la të kuptohej se nuk kishte ndërmend të linte postin.
Duke folur përpara bisedimeve rreth një qeverie tranzicionale që do ta përgatisë vendin për zgjedhjet në prill, Gruevski gjithashtu sulmoi kundërshtarët që kanë kryer protesta për largimin e tij.
“Në prill 2016, njerëzit do t’i japin mbështetjen më të madhe deri më tani VMRO dhe do të tregojnë se këta manipulues përtacë se nuk mund t’i intrigojnë dhe manipulojnë,” tha Gruevski në fjalimin e tij.
Duke këmbëngulur se partia e tij ka mbështetjen e gjysmë milioni votuesish – më shumë se më parë – ai gjithashtu e përshkroi opozitën dhe aktivistët e saj si elementë anti-shtetëror që nuk do kalojnë pa u ndëshkuar nga njerëzit.
Gruevski që mban pushtetin prej 2006 dhe që është akuzuar për autoritarizëm dhe korrupsion, këmbënguli se synimi i tij ishte anëtarësimi i vendit në BE dhe NATO.
Fjalimi vjen pas një krize të thellë politike që kaploi vendin dhe që ka në qendër pretendimin për përgjim ilegal të 20,000 njerëzve.
Opozita kërkon dorëheqjen e kryeministrit aktual. Përgjimet flasin për mashtrim me zgjedhjet, abuzim me gjyqësorin dhe median dhe sugjerojnë se qeveria mbuloi përgjegjësinë për vrasjen e një të ri nga një polic.
Si pjesë e përpjekjeve të BE-SHBA për të zgjidhur krizën, katër zyrtarë të lartë politikë nënshkruan një dokument aneks të premten në Shkup në të cilin konfirmuan zotim të plotë ndaj marrëveshjes për zgjedhjet e parakohshme të nënshkruar në 2 qershor nga Komisioneri i BE për Zgjerim, Johannes Hahn, si bazë për bisedimet e parashikuara për 29 qershor.
Ndërkohë Komisioni Europian ka bërë publik një raport në të cilin kërkon reforma kyçe në fusha të caktuara, si shërbimet e sigurisë, gjyqësori i pavarur, procesi elektoral dhe liria e medias. Gruevski tha në fjalimin e tij se raporti është mirëpritur si një udhëzim për reformat që do ta çojnë vendin drejt zhvillimit më të madh.