Raporti paraprak i KZLN nuk evidenton shkelje të rënda gjatë ditës së votimit, ndërsa shpreh shqetësimin për qytetarët që nuk mundën të votojnë.
Koalicioni për Zgjedhje të Lira dhe të Ndershme e Demokraci të Qëndrueshme, KZLN tha se nuk kishte vërejtur gabime të rëndësishme proceduriale apo shkelje gjatë ditës së votimit. Në raportin e vet paraprak, KZLN evidentoi shqetësime të vogla me grupet e komisionerëve apo zbatimin e procedurave ligjore.
Megjithatë, Koalicioni shprehu shqetësimin për një numër të konsiderueshëm qytetarësh, të cilët nuk mundën të votonin më 21 qershor.
“Është shumë shqetësuese që në 25 % të qendrave të votimit pati votues që nuk e gjetën emrin në listë,” tha Dhimitër Gjodede, analist pranë KZLN.
Raporti paraprak i vëzhguesve vendorë thekson se në 17 për qind të rasteve, komisionerët e qendrave të votimit nuk shpërndanë kopjen e procesverbalit të vulave të sigurisë tek vëzhguesit partiakë. Ndërsa 10 për qind e qendrave nuk kishin numrin e duhur të komisionerëve në momentin e hapjes.
Balanca gjinore në administrimin e zgjedhjeve është një tjetër element i përfshirë në raport, ku theksohet se vetëm në 15 për qind të qendrave në vend, gratë kryesonin komisionet e qendrave të votimit.
Vëzhguesit e pavarur kanë raportuar edhe për homologët e tyre partiakë. Sipas raportit, PS dhe PD kishin vëzhgues në 90 për qind të qendrave të votimit në vend. Pas tyre renditet Lëvizja Socialiste për Integrim, e cila kishte vëzhgues në 80 për qind të qendrave të votimit.
Raporti paraprak i vëzhguesve vendorë do të pasohet nga raporti i misionit të vëzhguesve të OSBE/ODHIR, i cili ndiqet me mjaft interes për shkak të certifikimit të standardit të këtyre zgjedhjeve.
Gjetjet e misionit të OSBE/ODHIR do të bëhen publike të hënën në orën 15:00, gjatë një konference për shtyp.