Votimi i së hënës në Këshillin Drejtues të Televizionit Publik Shqiptar nuk i ka dhënë 2/3 e votave asnjërit prej kandidatëve të mbetur në garë. Të enjten sprova e radhës.
Përballja e parë mes Thoma Gëllçit dhe Petrit Malajt për kreun e Televizionit Publik Shqiptar mbyllet pa një fitues. Dy kandidatët dolën në balotazh pas një procesi seleksionimi, por në votimin e së hënës, asnjëri prej tyre nuk ka mundur të marrë 2/3 e votave të Këshillit Drejtues të RTSH.
Thoma Gëllçi, ish-kryeredaktor i gazetës së Partisë Socialiste “Zëri i Popullit” është kthyer nga Shtetet e Bashkuara për të kandiduar për postin e drejtorit të Përgjithshëm. Rivali i tij në këtë garë, Petrit Malaj është aktualisht rektor i Universitetit të Arteve.
Në votimin e së hënës, Petrit Malaj ka marrë votat e 6 anëtarëve të Këshillit Drejtues, kundrejt 5 votave që shkuan për Gëllçin. Drejtori i Përgjithshëm i Televizionit Publik zgjidhet për një mandat 5-vjeçar me miratimin e 7 anëtarëve të Këshillit Drejtues, nga 11 gjithsej.
Konkursi për zgjedhjen e drejtorit të Përgjithshëm të RTSH u hap në datat 1-10 qershor nga Këshilli Drejtues. Në këtë garë u përfshinë 20 kandidatura, të cilët prezantuan platformat e tyre në një dëgjesë publike.
Në votimin e parë, Gëllci dhe Malaj morën një numër të barabartë prej 5 votash, duke dalë në balotazh. Kandidati i tretë në këtë garë, Artur Zheji mori një votë.
Zgjedhja e drejtorit të Përgjithshëm të Televizionit Publik konsiderohet si hapi i fundit i rifreskimit të strukturave të këtij institucioni, pasi posti ishte vakant që prej dorëheqjes së Petrit Becit në dhjetor 2013.
Pas dështimit të votimit të së hënës, Këshilli Drejtues vendosi të mblidhej sërish të enjten për një votim të dytë mes dy kandidaturave.
