Autori Sokol Mjacaj u dënua me 4 vjet burg për vrasjen e një të mituri në vitin 2010 dhe një muaj pas lirimit nga burgu ekzekutoi dy turistët çekë. Ministria e Drejtësisë nis inspektimin për gjyqtarët e Shkodrës.
Vrasja e dy turistëve çekë në Prekal të Dukagjinit mbrëmjen e 3 korrikut ka vënë sërish në shënjestër drejtësinë shqiptare. Sokol Mjacaj, 20 vjeçari i arrestuar për vrasjen tronditëse të turistëve Michal Svatos dhe Ana Kosinova ishte dënuar në vitin 2010 si bashkëpunëtor në vrasjen e një fëmije me 10 vjet burg.
Një vendim i dytë i Gjykatës së Apelit të Shkodrës i 4 janarit 2013 e reduktoi dënimin e Mjacajt nga 10 në 4 vjet burg, duke i dhuruar lirinë një muaj para se të kryente vrasjen e dy turistëve çekë. Sokol Mjacaj u arrestua të dielën në fshatin Grudë të Shkodrës nga forcat RENEA dhe pranoi autorësinë e vrasjes së Michal Svatos dhe Ana Kosinovës.
Një burim i Prokurorisë i tha BIRN se Mjacaj ka pohuar në dëshminë e tij se kishte si qëllim grabitjen e makinës së turistëve çekë, “por i vrau ata nga frika se mos i merrnin armën”.
Policia e Shkodrës e akuzon atë për “vjedhje me armë me pasojë vdekjen” dhe “armëmbajtje pa leje”. E ndërsa Prokuroria po analizon provat për të zyrtarizuar akuzën, vendimi i gjykatës për krimin e parë të kryer prej tij është rikthyer në vëmendjen e autoriteteve shqiptare.
Një grup inspektimi i Ministrisë së Drejtësisë është nisur të hënën drejt Shkodrës, për të verifikuar dy vendimet e dhëna për Sokol Mjacajn nga Gjykata e Shkallës së Parë dhe ajo e Apelit, pas vrasjes së kryer në shtator të vitit 2010.
Në një njoftim për mediat, Ministria e Drejtësisë tha se inspektimi kishte nisur pas urdhrit të ministrit Naço për të verifikuar procedurën gjyqësore që u ndoq ndaj Sokol Mjacajt, në çështjen e parë të gjykuar ndaj tij.
Pikëpyetje drejt vendimit të gjyqësorit për Sokol Mjacajn ka ngritur edhe ministri i Brendshëm, Saimir Tahiri, përmes një postimi në Facebook. Pas arrestimit të Mjacajt, ai falenderoi policinë dhe banorët e Dukagjinit dhe argumentoi se “autori ndoshta duhej të ishte në burg për krimet e mëparshme dhe jo të vriste përsëri”.
Vendimi që do të bëhet objekt i inspektimit të Ministrisë së Drejtësisë u dha më 4 janar 2013 nga Gjykata e Apelit të Shkodrës, nga një trup gjykues i drejtuar nga gjyqtari Musa Halili dhe anëtarët Fuat Vjerdha dhe Luan Dervishi. Sipas vendimit, Sokol Mjacaj, asokohe vetëm 15 vjeç kishte ndihmuar sy autorët e krimit t’i vidhnin një varëse floriri 13-vjeçarit Agim Lera dhe nuk kishte kallëzuar vrasjen makabre që iu bë më pas të miturit.
Përtej diskutimeve ligjore për vendimin e Gjykatës së Apelit, historia e Sokol Mjacajt nuk është një rast i izoluar në ato që konsiderohen vrasje të paralajmëruara në Shqipëri, apo të shkaktuara nga vendimet e diskutueshme të gjykatave.
Në janar 2014, një 53 vjeçar ekzekutoi bashkëshorten në Fier 4 ditë pasi ishte liruar nga burgu. Arben Muhaj ishte dënuar me 3 vjet burg nga shkalla e parë, ndërsa Apeli urdhëroi pezullimin e dënimit të tij.
Por rasti më i bujshëm ka qenë ai i Konstandin Xhuvanit, i cili u dënua me 2 vjet burg për një vrasje të kryer në vitin 2011. Pak kohë pas lirimit nga burgu, Xhuvani shkaktoi një masakër me 4 viktima në nëntor të vitit 2014 në Tiranë.
Ministria e Drejtësisë ka nisur procedura të ngjashme inspektimi si në rastin e Mjacajt edhe për ngjarjet e mësipërme. Megjithatë, masat ndëshkuese ndaj gjyqtarëve për vendimet e tyre të diskutueshme kanë munguar në të shkuarën.