Zijadin Sela, prej kohësh një lider fraksioni brenda Partisë Demokratike të Shqiptarëve, ka formuar një parti të re politike pasi nuk ia doli të marrë kontrollin e PDSH.
Partia e re, e quajtur Lëvizja për Reforma – Partia Demokratike e Shqiptarëve, u regjistrua të dielën, pasi një gjykatë vendase vendosi të mos ia japë kryesinë e PDSH Selës, i cili ka pretenduar se ishte presidenti me të drejtë për partinë opozitare.
Sela tha se ai do që partia e tij e re të bëhet zëri më i dëgjuar politik për shqiptarët e vendit, të cilët përbëjnë një të katërtën e popullatës prej 2.1 milionë në Maqedoni.
“Partia e re ka rreth 14,000 anëtarë të cilët përbëjnë më shumë se çdo parti tjetër shqiptare në vend,” tha Sela për median të dielën, duke shtuar se ai pret që rreth 80 për qind e anëtarëve të PDSH t’i bashkohen atij.
PDSH-ja megjithatë mohoi se anëtarët e saj do t’i bashkoheshin partisë së Selës.
Sela krijoi partinë e tij pasi një gjykatë refuzoi pretendimin e tij se kishte qenë lider i zgjedhur i PDA, në atë që ai tha se ishte një kongres legjitim i partisë. Gjykata vendosi se Menduh Thaçi është kryetari legjitim i PDSH-së.
Sela vitin e shkuar e akuzoi Thaçin se pretendon të jetë në opozitë, por në fakt është pjesë e një bashkëpunimi të ngushtë të drejtuar nga Nikola Gruevski, i cili akuzohet mes të tjerave për diskriminim të shqiptarëve.
Pretendimi i tij mori pak besueshmëri nga përgjimet ilegale të bëra publike në të cilat dëgjohet Thaçi që i pohon besnikëri deri në vdekje shefit të policisë sekrete i cili së fundmi dha dorëheqjen, Saso Mijalkov, një person i afërt me Gruevskin.
Sela, i cili është aktualisht kryebashkiak i Strugës, nuk është i paprekur nga skandalet. Në vitin 2012, si një legjislator i PDSH, ai kërcënoi të digjte asamblenë kombëtare nëse nuk kishte rrugë tjetër për të ndalur kalimin e një ligji kontraversal ushtarak që zemëroi shqiptarët.
Formimi i partisë së re vjen pas krizës së thellë politike ku është futur vendi, krizë që ka në qendër të saj përgjimet e paligjshme të kërkuara nga qeveria. Kriza ka kërcënuar gjithashtu reputacionin e PDSH dhe partisë tjetër etnike të shqiptarëve, Bashkimit Demokratik për Integrim.
Partia e re e Selës nuk është e vetmja përpjekje e kohëve të fundit për të përdorur krizën për të zënë vendin e PDSH.
Një tjetër konkurrent i kohëve të fundit në bllokun e shqiptarëve është edhe lëvizja Besa, e cila më 13 qershor mblodhi mijëra njerëz në protestë kundër Gruevskit.
