Pavarësisht ndryshimeve të pamohueshme të dekadës së fundit, në mediet e rajonit ende nuk mund të thuhet se stereotipet negative dhe paragjykimet historike për fqinjët i përkasin së kaluarës, nënvizon një studim i Institutit Shqiptar të Medias.
Instituti Shqiptar i Medias në bashkëpunim me ambasadën e Zvicrës në Shqipëri organizoi javës që shkoi në Tiranë konferencën rajonale “Raportimi i fqinjëve në median ballkanike,” ku morën pjesë gazetarë dhe studiues.
Në konferencë morën pjesë studiues, gazetarë, ekspertë të medias, përfaqësues të organizatave të mediave nga Shqipëria, Bosnja-Hercegovina, Kosova, Maqedonia, Mali i Zi dhe Serbia.
Gjatë konferencës autorët e studimit paraqitën të dhëna nga monitorimi i medias së shkruar, online dhe elektronike, se si portretizohen fqinjët në vendet e Ballkanit, rezultat i një pune disa mujore kërkimore të ekspertëve nga pesë vendet e mësipërme të rajonit..
“Konkluzionet e tyre nënvizojnë se ndërsa zhvillime të reja po ndodhin në fushën e bashkëpunimit rajonal, stereotipat e vjetra dhe gjuha e urrejtjes janë të pranishme kur është fjala për vendet dhe kombet e tjera,” tha në njoftim për shtyp të hënën Instituti Shqiptar i Medias.
“Të përmbledhura në një botim të posaçëm, studimet e realizuara japin një pasqyrë komplekse të rolit që luan media në marrëdhëniet ndërmjet fqinjëve,” ai shtoi.
Studimi kërkon të hedhë dritë se si pasqyrojmë fqinjët në media kur konfliktet e Ballkanit janë diçka e kaluar dhe vendet e tjera të rajonit gjenden në procesin e integrimit Euro-Atlantik; cili është imazhi i Tjetrit në median e rajonit si dhe cili është ndikimi i procesit të integrimit europian në mënyrën se si vendet e Ballkanit Perëndimor shohin njëri tjetrin.
Studiuesit gjithashtu kanë hulumtuar hipoteza mbi rolin e medias së re dhe medias sociale në krijimin e perceptimit për njëri tjetrin si dhe ndikimin e disa ngjarje të rëndësishme si; ndeshja e futbollit ndërmjet Serbisë dhe Shqipërisë, vizita e Kryeministrit Edi Rama në Belograd apo incidentet e fundit në Kumanovë.
