Policia e shtetit njoftojë të mërkurën se ka arritur të godasë dhe dokumentojë një grup të strukturuar kriminal i cili akuzohet për një seri vrasjesh me pagesë, që urdhëroheshin nga një i burgosur me dënim të përjetshëm në një burg të sigurisë së lartë.
“Pas punës së bërë nga ana e strukturave të hetimit të krimeve të Drejtorisë së Policisë së Qarkut Tiranë u dokumentua veprimtaria kriminale e 10 personave të implikuar, nga të cilët janë arrestuar 8 prej tyre, shpallur në kërkim 2 si dhe vazhdon puna për dokumentimin e veprimtarisë për 3 persona të tjerë,” tha policia e shtetit në një njoftim për shtyp.
Në përfundim të hetimeve rezulton e provuar se me porosi të shtetasit Admir Tafilaj, i dënuar me burgim të përjetshëm, i cili aktualisht vuan dënimin në I.E.V.P. Bradashesh, janë kryer një seri vrasjesh ose tentativë për vrasje gjatë vitit 2014.
Sipas policisë më datë më 25 qershor 2014, është kryer vrasja e shtetasit Brahim Mani në Shkodër nga shtetasi Kristi Pine. Gjatë nëntorit të vitit 2014 shtetasi Kristi Pine ka marrë porosi nga shtetasi Admir Tafilaj për të vrarë shtetasin Leonard Murataj, kundrejt një shume prej 50.000 euro. Shtetasi Leonard Murataj është ekzekutuar më pas nga persona të tjerë në qytetin e Durrësit.
Më datë 4 shtator 2014 me porosi të shtetasit: Adrian (Isuf) Uzuni, shtetasit Kristi Pine dhe Alfred Qefalia kanë tentuar të vrasin me armë zjarri shtetasin Edmond Çakmashi.
Ndërsa me datë 4 dhjetor 2014 nga shtetasi Fatos Koka i është dhënë porosi shtetasit Kristi Pine për të vrarë shtetasin M. L. për shkak të një konflikti pronësie të ndodhur në vitin 2010 në qytetin e Tiranës midis shtetasit M. L. dhe fisit Koka.
Përveç Tafilajt, polica ka arrestuar të dyshuarit Kristi Pine dhe Alfred Qefalia si ekzekutorë të grupit, si dhe Alksander Ridvan Goro, Elson Pal Merdani, Albano Beqiraj, Fatos Mehmet Koka si anëtarë bandës. Ndërkohë që Dhimiter Bujar Zito është shpallur në kërkim.
Një tjetër anëtar i bandës, Adrian Emaz Uzuni , i dyshuar si porositësi i një vrasje, është i arrestuar në Torino, Itali për vepra penale në fushën e narkotikëve në shtetin italian.
Banda e drejtuar nga Tafilaj akuzohet për një listë të gjatë veprash penale, përfshirë “Trafikimi i narkotikëve”, “Trafikimi i armëve dhe municionit”, “Shtrëngimi me anë të kanosjes ose dhunës për dhënien e pasurisë”, “Vrasjes me paramendim “Prodhimit dhe mbajtjes pa leje të armëve luftarake dhe municionit”, “Krijimit të grupit të strukturuar kriminal”, dhe “Kryerjes së veprave penale nga grupi i strukturuar kriminal.”