Lideri i Partisë Demokratike të Kosovës Hashim Thaçi nuk arriti t’i bindë të ndërrojnë mendje deputetët e partisë së tij të cilët votuan kundër themelimit të një gjykate të re speciale, e cila do të gjykojë ish-luftëtarët e UÇK-së.
Thaçi, i cili është gjithashtu Ministër i Jashtëm në Kosovë, mbajti një takim me deputetët e partisë PDK-së, Partia Demokratike e Kosovës, ditën e martë, por nuk arriti t’i bindte ata që kundërshtojnë të votojnë pro themelimit të Gjykatës Speciale në diskutimin e ardhshëm në parlament.
Thaçi theksoi “nevojën për të përfunduar sa më parë të jetë e mundur procedurën për gjykatën speciale”, dhe sugjeroi që parlamenti nuk duhet t’i marrë pushimet e tij vjetore në gusht para se kjo çështje të mbyllet.
“Mendoj se Parlamenti i Kosovës nuk duhet të marrë pushimet para përfundimit të kësaj procedure të rëndësishme,” tha ai.
Por në takimin e të martës nuk morën pjesë disa deputetë të PDK-së që votuan kundër gjykatës muajin e kaluar në parlament, kur ligjvënësit nuk arritën të miratonin ndryshimet kushtetuese që do të lejonin themelimin e saj.
Gjykata e re e propozuar është e papëlqyeshme në Kosovë për shkak se shihet si diçka që do të shkatërrojë luftën e armatosur të UÇK-së kundër forcave serbe gjatë luftës së viteve 1998-1999.
Midis shtatë deputetëve të PDK-së votuan kundër, ishte edhe Nait Hasani, i cili tha se do të bëjë përsëri të njëjtën gjë.
“Nuk do të votoj për krijimin e gjykatës speciale, e cila thjesht do të gjykojë UÇK-në. Duhet të ketë një gjykatë do të gjykonte të gjitha krimet e kryera në Kosovë,” tha Hasani për BIRN.
Deputeti Fadil Demaku gjithashtu nuk mori pjesë në takimin e partisë dhe ritheksoi kundërshtimin e tij për themelimin e gjykatës. “Unë do të votoj kundër. Ky është qëndrimi im,” tha Demaku.
Mbetet e paqartë nëse ndryshimet kushtetuese do të votohen përsëri ditën e enjte në seancën parlamentare.
Ka pasur presion të fortë nga BE-ja dhe SHBA për krijimin e gjykatës, e cila pritet të gjykojë ish-luftëtarët e UÇK-së për vrasje, rrëmbime, burgime të paligjshme dhe persekutim të serbëve, romëve dhe shqiptarëve të Kosovës që besohej të ishin bashkëpunëtorë të regjimit serb .
Ditën e martë, ministrja britanike e shtetit për punët e jashtme, Baronesha Anelay, shtoi presionin ndërkombëtar në rritje gjatë një vizite në Prishtinë.
“Kur Kosova të mbajë fjalën e saj dhe të krijojë gjykatën, ajo do t’i tregojë botës se Kosova është gati të ecë para dhe të pranohet ndërkombëtarisht si pjesë e botës,” tha Anelay në një konferencë të përbashkët për shtyp me presidenten e Kosovës Atifete Jahjaga.