Kryetari i Komisionit të Posaçëm, Fatmir Xhafaj paralajmëroi riformatim të KLD-së, ndryshime ligjore për Prokurorin e Përgjithshëm dhe variantet për kompetencat e Presidentit mbi sistemin e drejtësisë.
Fatmir Xhafaj, kryetar i Komisionit të posaçëm për reformën në drejtësi paralajmëroi tre ndryshime kushtetuese në paketën ligjore, që synon t’i hapë rrugën integrimit të mëtejshëm të Shqipërisë në BE.
Në një konferencë për shtyp, Xhafaj tha se ndryshimet do të prekin Këshillin e Lartë të Drejtësisë, Prokurorin e Përgjithshëm dhe kompetencat e Presidentit të Republikës mbi sistemin e drejtësisë.
“Situata është mjaft kritike. Sistemi i drejtësisë nuk kërkon makiazh, por ndërhyrje kirurgjikale,” tha Xhafaj, i cili drejton njëherazi dhe Komisionin e Ligjeve për llogari të mazhorancës.
Komisioni parlamentar për reformën në drejtësi u ngrit më 27 nëntor 2014, ndërsa një grup i gjerë ekspertësh të ligjit janë angazhuar për të përgatitur ndryshimet në sistem. Opozita e bojkotoi fillimisht komisionin, por dërgoi anëtarët e vet më 16 korrik 2015, pas një marrëveshjeje të arritur me mazhorancën.
Propozimet e grupit të ekspertëve kërkojnë një riformatim tërësor të KLD-së dhe ndryshim të kompetencave të Prokurorit të Përgjithshëm, përmes forcimit të rolit të Këshillit të Prokurorisë.
Sa i takon Presidentit, grupi i ekspertëve pranë Komisionit të Posaçëm është i ndarë mes dy variantesh; rikthim tek zgjedhja e tij me shumicë të cilësuar në Kuvend ose lënia e variantit aktual, por me kompetenca të reduktuara në sistemin e drejtësisë.
Kryetari i komisionit, Xhafaj tha të enjten se do të kërkohet konsensusi i opozitës, por jo deri në sakrifikim të reformës së shumëkërkuar nga Bashkimi Europian.
“Konsensusi për hir të konsensusit është i dëmshëm. Konsensusi duhet t’i shërbejë reformës jo reforma të sakrifikohet për hir të konsensusit,” tha Xhafaj.
Reforma në drejtësi është kushti kyç i Bashkimit Europian për rrugëtimin e mëtejshëm të Shqipërisë drejt integrimit. Megjithatë, hapat e ndërmarrë nga qeveria e drejtuar nga Edi Rama shihen me dyshim nga opozita shqiptare.
Eduard Halimi, nënkryetar i komisionit të posaçëm që përfaqëson Partinë Demokratike deklaroi se opozita do të prezantojë në shtator platformën e saj për reformën në drejtësi. Në një postim në Facebook të datës 2 gusht, ai u bën thirrje ekspertëve të ligjit që të japin kontributin e tyre për këtë platformë.
Paketa ligjore e reformës në drejtësi ishte planifikuar t’i kalonte parlamentit për miratim në vjeshtë. Një afat i tillë nuk duket megjithatë realist.
“Megjithëse jemi në fazën e tretë të reformës në drejtësi, ajo nuk do të përfundojë brenda vjeshtës,” u tha gazetarëve Fatmir Xhafaj.
