Dhjetëra mijëra shtetas serbë që kanë kërkuar azil në Gjermani përballen me kthimin në Serbi, duke e nxitur Beogradin të bëjë më shumë për të parandaluar largimin e njerëzve.
Mijëra persona nga totali i 200,000 shtetasve serbë që kanë kërkuar azil ose qëndrim në Gjermani, të cilët nuk kanë lejet e duhura të banimit përballen me kërkesat për t’u larguar nga vendi dhe për t’u kthyer në Serbi, raportoi të premten e përditshmja me bazë në Beograd, pa banim të Politika.
Rreth 24,000 prej tyre janë nxitur të largohen nga Gjermania këtë vit.
E përditshmja citoi zëdhënësen e Ministrisë së Brendshme gjermane, Lisa Hager, e cila tha në maj se 1311 shtetas serbë janë kthyer tanimë në Serbi sipas marrëveshjes mbi ripranimin mes dy vendeve.
Ajo tha se Gjermania e kishte klasifikuar Serbinë si një shtet origjine i sigurt për serbët ndaj ata kanë thuajse asnjë mundësi për të marrë azil. Gjermania me të njëjtën politikë ka kthyer edhe aplikantë të tjerë nga shtetet e Ballkanit.
Më shumë se 2300 persona nga Serbia kërkuan azil në Gjermani në korrik.
Sipas zyrtarëve gjermanë, 90 për qind janë romë të motivuar kryesisht nga faktorët ekonomikë.
Numri i azilkërkuesve nga Ballkani rritet çdo verë dhe vjeshtë sepse besohet se ata duan ta kalojnë dimrin në Gjermani.
Autoritetet gjermane i ofrojnë atyre strehë, ushqim dhe mbështetje financiare mujore prej 140 euro ndërsa janë në vend. E gjithë procedura e azilit shpesh kërkon muaj.
Hager gjithashtu tha se Gjermania ishte e kënaqur me nivelin e bashkëpunimit me Beogradin, por qeveria serbe duhet të punojnë për të përmirësuar kushtet e jetës për romët dhe të tjerët kur kthehen në atdhe.
Ministri serb i Punës, Aleksandar Vulin së fundmi tha se Serbia e respektoi marrëveshjen e ripranimit me Gjermaninë.
Aleksandar Popov, nga OJQ-ja në Novi Sad, Qendra për Rajonalizim, tha se Serbia përballet me një ‘problem kompleks’ me azilkërkuesit dhe se duhet të ndërmarrë veprime për të parandaluar largimin masiv të njerëzve.
“Serbia duhet të fillojë t’i japë njerëzve një mundësi për të parë begati në rajonin që prodhon më tepër azilkërkues, që është pjesa jugore… qeveria duhet gjithashtu të lançojë një fushatë direkte për t’i shpjeguar shumicës së azilkërkuesve se do të kthehen,” tha për BIRN Popov.
Rados Djuroviç, nga OJQ-ja Qendra e Mbrojtjes së Azilit me bazë në Beograd, pranon se një fushatë parandalimi është e nevojshme.
Serbia nuk do përballet me probleme madhore sapo të kthehen azilkërkuesit, shtoi ai.
“Gjermania do t’i kthejë njerëzit me faza, ndaj nuk do të shkaktojë problem për autoritetet serbe,” tha për BIRN Djuroviç.
Sipas raporteve gjermane në vitin 2015 vendi mund të përballet me një fluks total prej 800,000 refugjatësh kryesisht nga Lindja e Mesme dhe Afrika, gjë që do të vendoste rekord si viti me më shumë kërkesa për azil në Gjermani. Vlerësohet se Gjermania do të shpenzojë rreth dhjetë miliardë euro për azilkërkuesit.
Thomas de Maiziere, Ministri i Brendshëm gjerman ka nxitur partnerët e BE-së të bëjnë më shumë për të ndihmuar. “Gjermania nuk mundet të marrë 40 për qind të të gjithë refugjatëve që mbërrijnë në Europë,” tha ai.