Kroacia dhe Serbia mbyllën kufijtë e tyre për trafikun e ndërsjelltë të mallrave ndërsa mosmarrëveshjet mbi fluksin e stërmadh të refugjatëve u përshkallëzuan më tej.
Serbia dhe Kroacia mbyllën paralelisht kufijtë e njëra-tjetrës ndaj trafikut të mallrave dhe në disa raste, edhe të trafikut të njerëzve ndërsa të dy vendet hodhën akuza të ndërsjellta mbi fluksin e refugjatëve. Pasi Kroacia mbylli kalimet kufitare me Serbinë javën e kaluar, autoritetet e Serbisë vendosën në kundërbllokadë mesnatën e të mërkurës për mallrat që vinin nga Kroacia.
Nebojsa Stefanovic, ministri i brendshëm i Serbisë tha se kamionët me targa kroate apo automjetet që mbartnin mallra kroate nuk mund të hyjnë në Serbi.
Trafiku i pasagjerëve nga Kroacia do të lejohet si normalisht, shtoi Stefanovic.
“Ne nuk jemi të lumtur mbi gjithë këto masa që po vendosim për të mbrojtur interesin tonë kombëtar… Ajo që Serbia dëshiron është respektimi i vlerave europiane dhe kufijtë e hapur,” tha Stefanovic në pikën kufitare Batrovci mes Serbisë dhe Kroacisë.
Kroacia u përgjigj pas kësaj duke mbyllur kufijtë e vet ndaj automjeteve serbe, si të mallrave ashtu edhe të njerëzve.
E përditshmja kroate Vecernji list citoi ministrin e brendshëm të Kroacisë Ranko Ostojic duke thënë se kufijtë me Serbinë do të mbeten të mbyllur për të gjitha automjetet me targa serbe deri sa Serbia të rifillojë të dërgojë refugjatët sërish drejt Hungarisë.
Ministri i Drejtësisë në Serbi Nikola Selakovic tha se Kroacia e ka dhunuar idenë e lirisë së lëvizjes. Kroacia është përballur me një fluks të lartë refugjatësh që vijnë nga Serbia që nga java e kaluar, kur Hungaria mbylli kufijtë e vet me Serbinë.
Pas kësaj Kroacia e mbylli kufirin me Serbinë, gjë që alarmoi zyrtarët serbë të cilët thanë se ekonomia e tyre mund të vuajë dëme të mëdha në rast se bllokada vijonte.
Kryeministri i Serbisë Aleksandar Vucic i ka shkruajtur zyrtarëve europianë se Kroacia, si vend anëtar i BE-së, ka shkelur Marrëveshjen e Stabilizimit dhe Asocimit të Serbisë me Bashkimin Europian me mbylljen e kufijve për transportin e mallrave.
Vucic i tha B92 në Serbi se ai nuk mund të ndalonte nënshtetasit kroatë nga hyrja në Serbi por se bllokada për mallrat do të vijonte. Ai tha se qe e papranueshme që Kroacia po ndalonte njerëzit me pasaportë serbe të hynin në këtë vend.
“Ndaj masave ekonomike ne mund të përgjigjemi me masa ekonomike por ndaj çmendurisë nuk ke se si të përgjigjesh,” tha Vucic.
“Serbia nuk do t’i përgjigjet masave të çmendura. Ne mendojmë se ajo kohë – kur ti hipje në autobuz por ata të thoshin se nuk mund të vijosh udhëtimin – i përkasin të shkuarës,” tha ai.
Kryeministri i Kroacisë Zoran Milanovic tha se ai do të informonte BE-në mbi vendimin e qeverisë serbe, të cilin ai e përshkroi si një reagim jonormal.
“Që të jemi të qartë, nuk do të ketë dhunë apo luftë… por kjo nuk është sjellje normale,: tha Milanovic.
Ai shtoi se Serbia ka vepruar sërish kundër dëshirave të BE-së duke vendosur kundërmasa me ndalimin e kalimit për mallrat kroate.
Gazeta kroate Vecernji list raportoi se Përfaqësuesja e Lartë e BE-së Federica Mogherini ka folur me udhëheqësit kriatë dhe serbë dhe ka shprehur dëshirën që kufiri të rihapet.
Johannes Hahn, Komisioneri i Zgjerimit të BE-së, i cili do të vizitojë Beogradin të premten, ka kërkuar që vendet e Ballkanit Perëndimor të trajtojnë problemet e shkaktuara nga fluksi i lartë i refugjatëve në mënyrë njerëzore.
“Nëse kufijtë mbyllen, nëse kamionët nuk lejohet të kalojnë, kjo ka një ndikim të menjëhershëm në situatën ekonomike në rajon,” tha Hahn në një deklaratë për shtyp të enjten.
