Pas dy javësh vonesë, Këshilli Maqedonas i Prokurorëve pritet të shqyrtojë skuadrën e prokurorëve ndihmës që do të hetojnë zyrtarët e lartë në vend.
Delegacioni i Bashkimit Europian në Shkup dhe ambasada e Shteteve të Bashkuara në vend nxitën të martën Këshillin Kombëtar të Prokurorëve të mos vonojnë më gjatë dhe të lejojnë skuadrën e propozuar nga prokurorja speciale e sapocaktuar Katica Janeva për të filluar punën sa më shpejt të jetë e mundur.
“Është kritike që Këshilli i Prokurorëve Publik të përmbushë rolin e vet nën ligjin për investigatimin e komunikimeve të përgjuara dhe të caktojë skuadrën e Janevës, në mënyrë që zyra e saj mund të fillojë të përmbushë detyrat në mënyrë të pavarur dhe të lirë nga çdo lloj presioni politik,” tha delegacioni i BE dhe ambasada e SHBA-së në një deklaratë të përbashkët.
Formimi i një prokurorie të pavarur speciale për të hetuar rastet e përgjimit ilegal u ra dakord në një marrëveshje të ndërmjetësuar nga BE-ja mes qeverisë dhe opozitës muajin e shkuar për t’i dhënë fund krizës që ka kapur vendin.
Kreu i Këshillit Kombëtar të Prokurorëve, Petar Anevski, tha të martën se do të vendosë veçmas mbi secilin prej 14 zv.prokurorëve specialë të propozuar dhe për shkak të çështjeve specifike, seanca mund të zgjasë më shumë se zakonisht, ndoshta dy ditë.
Janeva më herët kërkoi miratimin e tyre sa më shpejt që të jetë e mundur.
Përpara procedurës së miratimit, Këshilli Kombëtar i Prokurorëve kërko dhe një plan pune, financiar dhe personeli nga Janeva, që e rishikoi të martën. Kërkesa u pa nga disa si një justifikim për vonesën e miratimit të zëvëndësve.
Janeva tha për median këtë fundjavë, se nëse gjithçka shkon sipas planit, akuzat e para kriminale ndaj politikanëve dhe zyrtarëve të lartë do të ngrihen përpara zgjedhjeve të parakohshme të prillit.
Plani i prokurores speciale të Maqedonisë parashikon 124 punonjës, përfshirë 30 persona si staf sigurie.
Kriza në Maqedoni rrotullohet rreth pretendimeve për përgjim masiv nga qeveria e kryeministrit Nikola Gruevski, i cili ka qëndruar në pushtet që nga viti 2006.
