Kryeministri Viktor Ponta ka dhënë dorëheqjen pas protestave mbi zjarrin në klubin e natës ku u vranë 32 të rinj, duke thënë se kupton mërinë e njerëzve që kërkojnë më shumë.
Kryeministri rumun, Viktor Ponta të mërkurën tha se do të jepte dorëheqjen pas pakënaqësisë së përhapur mbi korrupsionin në vend, pakënaqësi e intensifikuar nga fatkeqësia vdekjeprurëse në një klub nate në Bukuresht.
“Po dorëzoj mandatin tim, po dorëhiqem dhe po kështu edhe qeveria ime,” tha Ponta në një deklaratë.
Lajmërimi erdhi pasi më shumë se 20,000 persona marshuan në selinë qeveritare në Bukuresht të martën, duke kërkuar dorëheqjen e zyrtarëve të lartë përfshi Pontën pas zjarrit në klubin e natës.
Ponta po përballet tashmë me gjyq mbi akuza korrupsioni.
“Kam detyrimin të shoh mjerimin legjitim në shoqëri. Njerëzit ndjejnë nevojën për më shumë dhe do të ishte gabim nga ana ime ta shpërfillja këtë,” tha Ponta, duke iu referuar mijëra njerëzve që kërkuan për dorëheqjen e tij pas tragjedisë së të premtes.
Ponta shtoi se ai dhe ministrat e tij do të vazhdonin të kryenin detyrat e tyre derisa të krijohet një qeveri e re.
Në një zhvillim të lidhur, Cristian Popescu Piedone, kryebashkiak i distriktit ku ndodhet klubi i natës, ka dhënë gjithashtu dorëheqjen pas kritikave se ai lejoj që klubi të funksiononte pavarësisht mospërmbushjes së kritereve të sigurisë.
Dorëheqja e qeverisë erdhi si befasi, pasi kjo është hera e parë në 26 vjet që një ndryshim i tillë politik përcaktohet në Rumani nga protestat paqësore.
“E shoh vendimin e Pontës për t’u dorëhequr, pavarësisht nëse vullnetarisht apo i caktuar nga presioni i partisë, si një gjest që fuqizon njerëzit që protestuan pas tragjedisë në klubin e natës. Kjo është diçka e re për Rumaninë dhe duhet të shënojë një ndryshim në mënyrën si bëhet politika,” tha analisti politik Cristian Tudor Popescu.
Presidenti Klaus Iohannis do të emërojë një kryeministër për të formuar një qeveri të re, që duhet të marrë aprovimin e parlamentit. Nëse kjo dështon dy herë, do të thirren zgjedhje të parakohshme. Zgjedhjet e rregullta parlamentare do të mbahen në dhjetor 2016.
Zjarri në klubin e natës mori 32 jetë dhe 130 persona janë ende në spital.