Gjigandi i nxjerrjes së naftës Bankers Petroleum njoftoi se të ardhurat e saj ranë në 72 milionë dollarë në tremujorin e tretë të këtij viti nga 159 milionë dollarë që qenë në të njejtën periudhë të një viti më parë si pasojë e rënies drastike të çmimeve të naftës.
Rënia drastike e çmimit të naftës në tregun ndërkombëtar përgjysmoi të ardhurat nga nxjerrja e naftës në Shqipëri si dhe solli ulje të fortë të investimeve kapitale dhe një rënie të lehtë të prodhimit, bëri të ditur Bankers Petroleum, kompania kryesore e nxjerrjes së naftës në Shqipëri.
Sipas Bankers, “për tremujorin e tretë të vitit 2015, të ardhurat ishin 72 milionë dollarë (39.47 dollarë për fuçi nafte) në krahasim me 86 milionë dollarë (47.99 dollarë për fuçi nafte) në tremujorin e kaluar dhe 159 milionë dollarë (78.55 dollarë për fuçi nafte) në tremujorin e tretë të vitit 2014”.
Prodhimi mesatar ditor i naftës ra në 19,600 fuçi për tremujorin deri në 30 shtator 2015, 21,865 fuçi në ditë që qe në tremujorin e tretë 2014.
Të ardhurat e qeverisë shqiptare në formën e rentës minerare ranë nga 70 milionë dollarë në nëntëmujorin 2014 në vetëm 33 milionë dollarë këtë vit, sipas Bankers.
Ndërkohë, kompania njoftoi se një vlerësim tatimor që i kërkon qeverisë të paguajë 57 milionë dollarë tatim-fitimi është pezulluar nga gjykata ndërsa kompania në bashkëpunim me Agjencinë Kombëtare të Burimeve Natyrore ka punësuar një auditues me detyrën për të verifikuar shpenzimet e kësaj kompanie në lidhje me pretendimet e administratës tatimore.
Çmimi i naftës në tregun ndërkombëtar pësoi rënie të ndjeshme gjatë vitit të kaluar si pasojë e vendimit të kartelit të vendeve prodhuese të naftës OPEK për të mos ulur prodhimin. Nafta është produkti kryesor i eksportit shqiptar dhe rënia e çmimit të saj ka sjellë edhe rënie të përgjithshme të eksporteve shqiptare gjatë këtij viti.
