Kërkesa e investitorëve kaloi 600 milionë eurot mesditën e sotme ndërsa interesi pritet të jetë më pak se 6 për qind në vit.
Qeveria shqiptare hyri në tregun ndërkombëtar të borxheve sot duke kërkuar 300 deri në 500 milionë euro në formën e bondeve sovrane ku interesi referues pritet të jetë më pak se 6 për qind, bëri të ditur agjencia e lajmeve Reuters.
Sipas Reuters, qeveria shqiptare ka marrë sakaq kërkesa për më shumë se 600 milionë euro dhe se çmimi final i këtij borxhi pritet të përcaktohet më vonë.
Sipas revistës Monitor, e cila i referohet burimeve konfidenciale nga qeveria e Shqipërisë, kuponi i këtyre bondeve pritet të jetë rreth 5.75 për qind në vit, interes ky ndjeshëm më i ulët se sa bondet sovrane të mëparshme, të cilat u maturuan dhe u shlyen pak ditë më parë, por sërish shumë të shtrenjta për ekonominë shqiptare.
Qeveria shpalli synimin për të emetuar bonde sovrane në euro më herët këtë vit me qëllim që të rishlyente bondet aktuale prej 300 milionë euro dhe për të siguruar financime të huaja për deficitin buxhetor. Në atë kohë, interesat e bondeve për vende si Shqipëria varionin në 3 apo 4 për qind. Por gjendja e tregjeve ndërkombëtare u përkeqësua pas krizës politike në Greqi në verën e këtij viti, gjë që solli edhe shtrenjtimin e interesave të bondeve.
Qeveria shqiptare siguroi një kredi nga Deutsche Bank me garanci të pjesshme nga Banka Botërore, e cila shërbeu për të shlyer bondet aktuale sovrane, por pavarësisht kësaj, vendosi të vijojë me planin për të emetuar bonde të reja.
Vendimi final i qeverisë mbi shumën e bondeve të emetuara pritet të ndërmerret më vonë.
Shqipëria doli në treg ndërkombëtar në vitin 2008 për të marrë një kredi sindikale për të financuar ndërtimin e rrugës Durrës – Kukës dhe e siguroi atë në masën 230 milionë euro me interes euribor plus 1.25 për qind. Qeveria shqiptare hyri në krizë në vitin 2009, kur shpenzimet e planifikuara për rrugën në fjalë u dyfishuan në krahasim me pritshmëritë financiare duke kapërcyer nga 420 milionë euro që qe menduar në fillim në mbi 1 miliardë euro. Përveç kredisë së vitit 2008, qeveria shqiptare hyri në negociata me disa banka ndërkombëtare në vitin 2009, për një kredi sindikale me vlerë 250 milionë euro, për të cilën u detyrua të paguajë një interes prej euribor plus 9.65 për qind. Kjo qe edhe kredia më e shtrenjtë në historinë e shtetit shqiptar, duke kapërcyer edhe kredinë SVEA të qeverisë italiane për Shqipërinë në vitin 1926, e cila kishte interes prej 7,5 për qind.
Në vitin 2010, Shqipëria emetoi bondet e para sovrane në euro, për një shumë prej 300 milionë eurosh, me kupon prej 7.5 për qind në vit.
Qeveria shqiptare gjendet aktualisht në udhëkryq, pasi plani i saj për rigjallërimin e ekonomisë dhe zvogëlimin e borxhit publik si përqindje e PBB-së nuk po funksionojnë. Borxhi aktualisht ka arritur në 74 për qind të PBB-së dhe ekziston rreziku që ai të rritet më tej në vitet e ardhshme.
