Deputetët e shumicës parlamentare u detyruan ta miratojnë buxhetin 2016 ndërsa u izoluan në një ambient tjetër, pasi deputetët opozitarë hodhën përsëri gaz lotsjellës në kuvend.
Deputetët e opozitës në Kosovë shkaktuan përsëri kaos të martën në mbledhjen parlamentare që do të miratonte buxhetin e vitit 2016.
Deputetët e opozitës, udhëhequr nga Lëvizja Vetëvendosje, hodhën gaz lotsjellës në parlament dhe në korridore, si dhe spërkatën me spraj piperi personelin e sigurisë.
Në një veprim aty për aty, anëtarët vendosën të ndryshojnë vendtakimin dhe ta mbajnë seancën në një holl tjetër.
“Për shkak të zhvillimeve të jashtëzakonshme, që vënë në rrezik shëndetin e deputetëve, vendosëm të marrim masa të jashtëzakonshme,” tha kryetari i asamblesë Kadri Veseli për median.
Deputetët e partisë në qeveri, diplomatët, vëzhguesit dhe gazetarët u mblodhën në një dhomë më të vogël për të diskutuar buxhetin ndërsa jashtë ndërtesës protestuesit hodhën gurë dhe bojë ndaj forcave speciale të policisë.
Tre parti opozitare, Vetëvendosje, Aleanca për Ardhmërinë e Kosovës, AAK, dhe Nisma, janë betuar të ndalojnë seancat parlamentare derisa qeveria të tërhiqet nga marrëveshjet kyçe të arritura me Serbinë në gusht.
Marrëveshja më e kundërshtuar lidhet me krijimin e Lidhjes së Komunave Serbe që i jep atyre pushtet të madh.
Partitë opozitare thonë se pushtetet e dhëna ndaj lidhjes do ta bëjnë atë mjaftueshëm të pavarur, si entiteti i dominuar nga serbët në Bosnjë, Republika Srpska.
Kjo është hera e dytë në më pak se një muaj që deputetët e qeverisë u zhvendosën në një tjetër ambient për të mbaruar punët e parlamentit. Deputetët opozitarë u përpoqën të kalojnë përmes forcave të sigurisë për të hyrë në ambientin e tyre por nuk ia dolën.
Kryeministri Isa Mustafa tha se ishte e papranueshme për shumicën e parlamentit, 90 deputetë, që të dëboheshin nga dhoma prej vetëm 30 deputetëve.
“Çfarë ndodhi sot qe një akt kriminal. Ata që hedhin gaz lotsjellës duhet të çohen përpara ligjit,” tha Mustafa në asamble.
Buxheti i vitit 2016 u miratua me votat e koalicionit qeverisës.