Rreshjet e dendura të shiut që përfshinë Shqipërinë gjatë 24 orëve të fundit kanë lënë pa drita një pjesë të vendit ndërsa në Lurë, një 27 vjeçar u rrëmbye nga rrjedha e lumit. Në Tiranë, lumi përmbysi kasollet e familjeve të varfra në zonën e Babrrusë. Një pjesë e konsiderueshme e vendit ka mbetur pa energji elektrike si pasojë e avarive në rrjet.
Qeveria shqiptare urdhëroi mbledhjen e shtabeve të emergjencave në të 12 prefekturat e vendit pasi rreshjet e dendura të shiut shkaktuan një viktimë si dhe përmbytje e bllokim rrugësh, ndërprerje të furnizimit me energji e telashe të tjera.
Policia e Shtetit njoftoi se “në njësinë Administrative Lurë, (në Dibër) ka humbur jetën shtetasi Adil Vladi 27 vjeç, i cili ishte duke pastruar një kanal uji në hidrocentralin Lura 1, Lura 2, në Armollë. Sipas informacioneve ai është rrëmbyer nga rrjedha e ujit”.
Ndërkohë, një pjesë e konsiderueshme e lagjeve të Tiranës janë zhytur në ujë. Situata duket alarmante për disa familje që kanë banesat pranë Lumit të Tiranës pranë urës së Babrroit. Një video e publikuar në faqen popullore Jeta Osh Qef në Facebook, tregon se shumë familje të varfra janë detyruar të braktisin kasollet e tyre për shkak të prurjeve të lumit.
Probleme të rënda pati edhe në një segment të autostradës Tiranë-Durrës, e cila, sapo i qe nënshtruar një projekti zbukurimi me vlerë 3 milionë dollarë, ku përfshihej hapja e kanaleve kulluese anësore dhe mbjellja e palmave, por që duket se kanalet kulluese nuk kanë funksionuar siç duhet.
Në qytetin e Fushë-Krujës, raportohet se lumi i vogël Zezë është fryrë nga prurjet dhe ka përmbysur shumë banesa.