Duke mundur paragjykimin kundër grave në pozicione të larta në polici, pesë police janë diplomuar nga një program special që do t’i mundësojë atyre të drejtojnë operacione të rëndësishme.
Kur policia shqiptare dhe programi amerikan për investigim kriminal ICITAP hapën një thirrje për të stërvitur police që do të drejtonin operacionet kundër krimit në Shqipëri një vit më parë, vetëm 16 gra nga 84 prej atyre që u ftuan të aplikonin treguan interes.
Në muajt e parë të vitit 2015, gjatë këshillimeve të para, u bë e qartë se gratë që filluan trajnimin duhet të përgatiteshin të punonin pa orare fikse dhe të merrnin përgjegjësi për operacione të mëdha në terren. Tetë gra të tjera u tërhoqën.
Trajnimi filloi në prill me vetëm tetë gra dhe të enjten vetëm pesë prej tyre morën certifikata, duke hapur një kapitull të ri në jetët e tyre profesionale.
Këto të pesta në muajin e ardhshëm do të lënë pozicionet e tyre të vjetra dhe do të fillojnë të drejtojnë stacione policie dhe sektorë kundër krimit – të parat gra në Shqipëri trajnuar për këtë gjë.
Lindita Nushi, që ka qenë një anëtare e policisë shqiptare për 18 vjet dhe është një specialiste në gjurmimin e të arratisurve nga policia, është një nga pesë të certifikuarat.
Ajo i tha BIRN se gjithnjë donte të rikthehej në terren dhe mundësia për t’u kthyer në pozicion drejtues ishte një mundësi e artë.
“Përpara se të merrja vendimin, mblodha familjen time dhe i pyeta nëse do të më mbështesnin në këtë iniciativë. I pari që tha “po” ishte burri im dhe ky ishte çasti kur rashë në dashuri me të për herë të dytë,” tha ajo.
Kryekomisaria Nushi është nënë e dy vajzave të vogla dhe iu bashkua policisë në vitin 1997, një vit i vështirë kur Shqipëria po shkatërrohej nga një kryengritje civile dhe shumica e territorit kontrollohej nga grupet e armatosura.
“Kam qenë pranë vdekjes shumë herë në fillim të karrierës kur mbaja trupa të vdekur në duar dhe më janë drejtuar armë në kraharor,” tha ajo.
Por ajo është ende në ankth për përgatitjen e një pozicioni drejtues operacional në terren kur gjinia duket se ende luan një rol.
“Ne jemi gratë e para që marrin këto role dhe do të jetë një përgjegjësi e madhe. Mendoj se nëse bëj një punë të mirë do të hap rrugën për koleget e mia femra, por nëse dështoj do të konsiderohet një problem gjinor,” shtoi ajo.
Kolegia e saj, Kryekomisarja Anila Popa, është një tjetër grua që është trajnuar për të drejtuar operacione në terren.
Ajo i tha BIRN se “shpirti i saj luftarak” dhe një besim se gratë shqiptare duhet të marrin role më të mëdha në sferën publike e kanë nxitur të ndjekë karrierën në polici.
“Unë dhe familja ime kemi bërë sakrifica të mëdha për karrierën time. Kam rritur dy djem ndërsa kam punuar si oficere policie dhe kam marrë njëkohësisht pjesë në studime sigurie,” tha ajo.
Pas një diplome në letërsi, Popa mori një diplomë nga Akademia e Policisë dhe ka një master në çështjet e sigurisë, pasi studioi dy vite në Francë.
Ajo beson se në Shqipëri është më e lehtë për burrat sesa për gratë të ndjekin një karrierë në polici.
“Ne ende i shohim gratë si të papërshtatshme për këto role në shoqërinë tonë dhe unë e shoh si detyrën time të tregoj se ne mund të bëjmë më shumë,” tha ajo.
Policia nuk ka qenë kurrë një vend i rehatshëm për gratë në karrierë në Shqipëri. Dy vite më parë, numri i grave në polici ishte vetëm rreth 500 ndër 11,000 policë.
Tani, si rezultat i programeve të ndërmarra për të reduktuar hendekun gjinor dhe për t’i dhënë policisë një imazh më të butë, numri i grave police është dyfishuar në 1100.
Për të rritur numrin e grave police, në Akademinë e Policisë po vendosen kuota dhe po hartohen programe të ndryshme për të ndihmuar gratë të ngjisin më shpejt shkallët e karrierës.
