Kurti u arrestua brenda selisë së Lëvizjes Vetëvendosje, pak kohë pasi ai u shfaq në tribunën e protestës së opozitës në qendër të Prishtinës. Operacioni u shoqërua me përplasje mes policisë dhe protestuesve.
Policia e Kosovës arrestoi liderin e Vetëvendosjes, Albin Kurti dhe shoqëroi rreth 90 aktivistë të lëvizjes opozitare, nën një situatë të tensionuar që pasoi protestën e së shtunës në Prishtinë. Kurti u arrestua brenda selisë së Vetëvendosjes, pasi dhjetra policë u përplasën me aktivistët e kësaj lëvizjeje.
Pas arrestimit, Kurti dhe aktivistët e tjerë të Lëvizjes Vetëvendosje janë dërguar në Prokurorinë Themelore të Kosovës, në Pallatin e Drejtësisë. Hamdi Ibrahimi, kryetar i kësaj gjykate konfirmoi për Kallxo.com se “jemi në pritje të kërkesës nga ana e Prokurorisë, për caktimin e masës së sigurisë për Kurtin”.
Albin Kurti u arrestua për shkak se ndaj tij ishte lëshuar një urdhër-arrest nga Prokuroria e Kosovës për protestat me gaz lotsjellës në brendësi të Parlamentit. Policia e Kosovës ishte vënë prej ditësh në ndjekje të tij.
Arrestimi i Kurtit dhe shoqërimi i dhjetëra aktivistëve të Vetëvendosjes u njoftua përmes një komunikate nga policia.
“Njësitet relevante policore, të cilat ishin në kërkim të personit të kërkuar me urdhërarrest (z.Kurti), kanë arritur ta lokalizojnë dhe të njëjtin ta shoqërojnë për në organet e drejtësisë, ashtu siç parashihet në urdhërarrest,” thuhet në komunikatën e policisë.
Policia pretendon gjithashtu se gjatë gjatë kërkimit të Kurtit brenda selisë së “Vetëvendosjes”, disa persona janë sjellë dhunshëm.
“Njësitet relevante policore, pas intervenimit brenda në objekt kanë hasur në rezistencë të disa personave të dhunshëm të cilët kanë qenë brenda në objekt, e të cilët kanë hedhur mjete të ndryshme të forta drejt zyrtarëve policor, duke përfshirë shkopinj, karrige, tavolina, mjete të metalta dhe sprej, ku si pasojë e saj dy policë dhe dy persona tjerë kanë pësuar lëndime,” thuhet në komunikatë.
Lëvizja Vetëvendosje deklaroi se nga aksioni i policisë janë arrestuar 90 aktivistë dhe akuzon policinë për ndërhyrje të dhunshme në selinë e Lëvizjes Vetëvendosje.
“Policia ka arrestuar mbi 90 aktivistë deri me tash. Disa prej tyre janë te lënduar rëndë nga dhuna brutale policore,” thuhet në njoftimin e VV-së.“Dënojmë arrestimin e tyre të padrejtë dhe kërkojmë lirimin e tyre të menjëhershëm”, thotë Vetëvendosje.
