Zyrtarët e sigurisë thanë se po monitorojnë nga afër kërcënimet e mundshme nga maqedonasit islamikë të kthyer nga Siria dhe Iraku, por paralajmëruan se kriza e refugjatëve po e ndërlikon situatën.
Ushtria dhe oficerët e policisë të mërkurën thanë se po ndjekin nga afër kërcënimet e mundshme nga maqedonasit që dyshohet të kenë luftuar krah islamikëve radikalë në Siri ose që janë të afërt me ta.
Në një konferencë në Shkup mbi rreziqet e sigurisë, ata këmbëngulën se pa u rritur kërcënimi nuk ka vend për panik.
“Nëse e sheh historikisht, kërcënimet kanë ekzistuar para dhe pas sulmeve terroriste të Parisit,” tha gjenerali i dalë në pension Dragan Andrevski, kreu i Klubit të Gjeneralëve Maqedonas, që organizoi konferencën.
“Por nëse do të jetë nevoja, strukturat e sigurisë do të marrin masat për të parandaluar përkeqësimin e situatës,” shtoi ai.
Konferenca që bashkoi oficerët ushtarakë aktualë dhe ata në pension, ku morën pjesë dhe zyrtarë të policisë, arriti në përfundimin se kërcënimi më i madh vjen nga shtetasit maqedonas të radikalizuar dhe jo nga vala e refugjatëve që vijnë tranzit në vend për të shkuar në Europën Perëndimore.
Megjithatë një përfaqësues në konferencë i tha BIRN në kusht anonimiteti se “rritja e masave të sigurisë pas sulmeve të Parisit janë ende në forcë”.
Sipas presidentit maqedonas Gjorge Ivanov dyshohet se 69 maqedonas janë kthyer nga Siria, 110 prej tyre janë ende atje dhe 25 kanë vdekur deri më tani në konflikt.
Ivanov këmbënguli se kriza e refugjatëve po shpërqendron vëmendjen e forcave të sigurisë nga kërcënimi i terrorit.
Të premten e shkuar, policia tha se kishte arrestuar një maqedon i identifikuar si S.R, i moshës 21 vjeç nga Shkupi, dyshuar si i përfshirë me ISIS në Afganistan.
Maqedonia këtë vit e bëri të paligjshëm bashkimin ose rekrutimin për paraushtarakë të huaj.
Policia i hodhi poshtë disa raportime të medias sipas së cilave një grup xhihadistësh, përfshirë famëkeqin Lavdrim Muhaxheri nga Kosova, dyshohet se fshiheshin në një fshat me etni shqiptare pranë Shkupit, duke thënë se ata dhe autoritetet e Kosovës nuk kishin një informacion të tillë.
Më herët ka pasur lajme të pakonfirmuara se Muhaxheri është vrarë në Siri.
