Avokatët thanë se gjykata do të japë vendimin përfundimtar vitin e ardhshëm për çështjen se kush do ta trashëgojë pasurinë e ish-presidentit jugosllav Josip Broz Tito, përfshirë bizhuteri, gurë të çmuar dhe monedha ari.
Ndarja e vonuar prej kohësh e pronës së Titos u afrua edhe më shumë të mërkurën kur Gjykata e Shkallës së Parë në Beograd shqyrtoi të gjitha provat në një çështje për trashëgimin që është zvarritur për më shumë se tre dekada.
“Sot të gjitha provat e marra nga gjykata janë lexuar dhe tani presim vendimin… ndoshta në fillim të vitit të ardhshëm,” tha Violeta Kociç-Mitacek, avokate e trashëgimtarëve të Titos.
Trashëgimtarët e liderit janë djali i tij Misha Broz dhe nipërit Josip, Zlativa dhe Eduard Broz.
Ata dhe shteti po pretendojnë përmbajtjen e një kasaforte në Bankën Kombëtare të Serbisë që përmban mobilie të shtrenjta, koleksione pullash, monedha ari, bizhu, gurë të çmuar dhe ora të shtrenjta mes të tjerash.
Anëtarë të ish familjes mbretërore Karadjordjeviç të Jugosllavisë gjithashtu po marrin pjesë në diskutimin e trashëgimisë, duke kërkuar asete që sipas tyre i përkisnin dinastisë dikur.
Avokati i tyre, Zoran Zivanoviç, i tha BIRn se ata presin gjithashtu vendimin e gjykatës vitin e ardhshëm.
“Është e vështirë të presësh një vendim brenda 15 ditësh sepse është një çështje e madhe gjyqësore dhe kërkon shumë punë,” tha Zivanoviç.
Gjyqësori nuk ia doli të ndajë pronat e Titos që nga vdekja e tij në vitin 1980.
Disa nga pasuritë e tij, përfshirë vila dhe makina të shtrenja i shkuan shteteve të fomuara pas shpërbërjes së Jugosllavisë; disa u vodhën dhe fati i të tjerave pritet të vendoset.
Një gjykatë jugosllave lëshoi një vendim për ndarjen e aseteve në vitin 1989 por Jovanka Broz, e veja e Titos nuk e pranoi.
Tito drejtoi Jugosllavinë nga 1945 deri në vdekjen e tij në vitin 1980.
Foto: Wikimedia commons.
