Shkollat po përballen me sfidën e ripranimit të mijëra fëmijëve që jetuan për shumë muaj si azilkërkues në Europë dhe që tani do të duhet të rikthehen në klasë.
Shkollat shqiptare po punojnë për të ripranuar disa mijëra fëmijë, mësimet e të cilëve u ndërprenë nga aventura e prindërve që i morën me vete në përpjekje për të siguruar azil në vendet e Europës Perëndimore, veçanërisht në Gjermani.
Të dhënat statistikore nga Eurostat tregojnë se 26,790 fëmijë shqiptarë nën 17 vjeç ikën nga vendi përgjatë dy viteve të fundit pasi familjet e tyre kërkuan azil.
Numri i kërkesave për azil në emër të shqiptarëve minorenë u rrit në 21,390 në vitin 2015 nga 5,400 që qe në vitin 2014.
Gjermania e mbylli derën për azilkërkuesit shqiptarë duke e shpallur Shqipërinë vend origjine të sigurtë, gjë që përshpejtoi kthimin e azilkërkuesve. Pas kthimit nga Gjermania, një numër i panjohur fëmijësh duhet të rikthehen në shkollë.
Gjatë muajve të pritjes së procedurave për azil jashtë vendit, ata raportohet se janë vënë në kopështe, shkolla apo në kurse gjuhe.
Rikthimi i tyre në sistemin arsimor shqiptar është i vështirë për të dyja palët.
Zëvendësminisrja e Arsimit Nora Malaj i tha BIRN se ministria i ka dërguar shkollave në fund të vitit të kaluar një rregullore të detajuar duke këshilluar drejtorët për masat që duhet të ndërmerren për rikthimin në shkollë.
“Ne po ofrojmë programe shtesë për fëmijët e rikthyer nëpër shkolla dhe orë mësimesh shtesë në mënyrë që ata të rikuperojnë kohën e humbur,” tha Malaj.
Përveç ndihmës mësimore, psikologët e shkollave janë udhëzuar të tregojnë kujdes për të kthyerit.
“Ne po përpiqemi t’i bëjmë në ndjehen të pikpritur, veçanërisht fëmijët në shkollë të mesme për shkak se ata mund të jenë më të ndjeshëm ndaj ndryshimit të mjedisit,” tha Malaj.
Ministria e Arsimit dhe institucionet e tjera po hartojnë një listë me fëmijët e kthyer, gjë që mund të ndihmojë të identifikohen ata që nuk janë kthyer në shkollë pas aventurës në Gjermani.
Shqiptarët qenë grupi më i madh i azilkërkuesve në Gjermani pas sirianëve gjatë vitit të kaluar.
Plot 54,762 shqiptarë kërkuan azil në vitin 2015. Shumica dërrmuese e tyre u refuzuan nga autoritetet gjermane ndërsa numri i atyre që janë kthyer efektivisht mbetet i panjohur.
