Fermerët që po protestojnë kundër planeve të qeverisë greke për të rritur taksat bllokuan gjatë ditës së djeshme pikat kufitare që lidhin Greqinë me Bullgarinë.
Protestat e fermerëve, të cilat vijojnë prej ditësh, pritet të bllokojnë trafikun në të trija pikat kufitare mes Bullgarisë dhe Greqisë pasi pika e parë u bllokua të martën (2 shkurt). Fermerët po protestojnë kundër vendimit të qeverisë së kryeministrit Tsipras për uljen e subvencionimeve bujqësore dhe reformën e pensioneve bujqësore, e cila parashikon rritjen e masës së kontributeve për pensionet si dhe rritjen e disa taksave të tjera.
Pika kufitare Kulata është mbyllur për kamionët ndërsa një rradhë prej 15 kilometrash është krijuar në anën e Bullgarisë. Gjatë natës pati përleshje pasi shoferët e kamionëve u përpoqën të thyejnë bllokadën e fermerëve.
Një situatë e ngjashme është në anën greke të kufitir, ku shoferët bullgarë janë bllokuar tashmë prej ditësh pa ujë e pa ushqime. Ata i bënë thirrje ministrisë së jashmte të Bullgarisë të ndërhyjë duke i dërguar Greqisë një notë proteste.
Ministria e Brendshme e Bullgarisë publikoi një njoftim ku paralajmëroi se kalimi i të gjitha makinave është përkohësisht i bllokuar. Protestuesit planifikojnë ta vijojnë bllokadën për 48 orë.
Protesta ka prekur edhe pjesë të tjera të Greqisë, përfshirë autostradën mes Athinës dhe Selanikut si dhe portet e pikat kufitare me vende të tjera fqinje. Një protestë masive nisi të martën në të gjithë Greqinë.
