Një anketë zbuloi se nëse rumunëve do t’i jepej mundësia të votonin për figura historike, shumë prej tyre do të votonin për princin e egër mesjetar i njohur për nguljen në hu të armiqve të tij.
Demokracia mund të jetë një foshnjë e lindur e vdekur në Rumani, nëse marrim parasysh rezultatet e një ankete të kryer së fundmi, e cila tregoi se shumë rumunë kanë dëshirë t’ia dorëzojnë vendin e tyre një princi të pamëshirshëm mesjetar, të quajtur Vlad Ngulësi – nëse ai do të qe gjallë.
Princi i Vllakisë, zona që sot është Rumania e jugut, shihet gjerësisht si hero dhe një udhëheqës i madh për shumë rumunë.
“Vladi qe një mbret i vërtetë. Natyrisht, ai qe një princ i pamëshirshëm dhe bëri shumë gjëra të këqija, por më së shumti ndaj të pasurve dhe tregtarëve,” komentoi 63 vjeçarja Steliana Notaru.
“Ne na duhet një udhëheqës i fortë tashmë më shumë se kurrë, për shkak se Rumania është duke vuajtur nga korrupsioni dhe pasiguria,” shtoi Notaru.
Një anketë e kohëve të fundit e kryer nga kompania CSCI me më shumë se 1 mijë të intervistuar, tregoi se 35 për qind e rumunëve do të votonin Vladin nëse zhvilloheshin zgjedhje mes figurave historike. Vlad Tepes, i njohur më shumë si “ngulësi” për brutalitetin e tij, udhëhoqi rezistencën e rumunëve ndaj perandorisë Osmane kur kjo e fundit pushtoi Transilvaninë në mes të shekulli të 15. Ai më pas dogji rrethinat e qytetit të Brasovit dhe vrau qindra gjermanë “Saksonë” që jetonin atje.
Kjo ngjarje e shfaqi atë si një sadist që i pëlqente të vriste dhe të torturonte njerëz. Legjendat e mizorisë së tij kaluan nga një gjeneratë në tjetrën përmes pamfleteve të publikuara në Gjermani.
Por Vlad Tepes mbetet një figurë popullore mes shumë njerëzve që parapëlqejnë një udhëheqës të ashpër që kryen veprime të pakuptimta.
“Për shumicën e rumunëve, Vlad Tepes mbetet një simbol i luftës kundër korrupsionit. Ata citojnë vetëm një fakt se ai përdori metoda të ashpra për të rimarrë vendin nga bojarët e pasur dhe të korruptuar dhe se ai qe i pamëshirshëm me hajdutët dhe lypësit,” thotë historiani Alexandru Voicu.
“Edhe nëse ata e pranojnë se ai qe një princ mizor, ata argumentojnë se së paku ai qe i ndershëm,” shton ai.
Legjendat e përgjakshme mbi Vlad Ngulësin frymëzuan shkrimtarin irlandez Bram Stoker për të krijuar librin e tij të famshëm Drakula.
Ditët e sotme, autoritetet e Rumanisë kanë luajtur me legjendën e tij për të tërhequr turistë në Transilvani, më së shumti te kullat gotike të Kështjellës Bran, e cila u ndërtua në shekullin e 14 për tq shërbyer si fortesë doganore që mbronte kufirin lindor të Transilvanisë.
Vladi nuk është i vetmi personazh famëkeq historik që ka tërhequr vëmendjen e njerëzve gjatë viteve të fundit.
Rumunët tashmë kanë ndjenja të përzjera mbi atë që dikur qe regjimi i urryer komunist. Të shqetësuar nga vështirësitë e tyre financiare, shumë njerëz thonë se nuk kanë ndonjë ndjenjë të fortë në lidhje me regjimin që mori pushtetin më 1947 dhe u rrëzua në dhjetor 1989.
Anketat tregojnë se gati gjysma e popullsisë besonte se jeta qe më e mirë në kohën e komunizmit, duke arsyetuar se siguria në punë qe shumë më e mirë se sa sot.
