Media raporton se Turqia ka ndaluar të hyjë në këtë vend Ahmed Dogan, një politikan i fuqishëm turk etnik në Bullgari si dhe pronarin e mediave Delyan Peevski, për shkak të mendimeve të tyre të shprehura publikisht pro Rusisë së Putinit.
Turqia raportohet se i ka ndaluar hyrjen në këtë vend dy politikanëve të një partie turqisht në Bullgari, Lëvizja për të Drejta dhe Liri, MRF – presidentit të nderit të saj Ahmed Dogan dhe deputetit e pronarit të mediave Delyan Peevski – bëri të ditur media turke të enjten.
Gazeta proqeveritare turke Sabah raportoi se ndalimi qe pasojë e qëndrimeve pro-ruse të mbajtura nga Dogan dhe Peevski pasi Turqia rrëzoi një avion rus në dhjetor 2015.
Ndalimi u konfirmua në një letër nga ambasada turke për median bullgare. “Ne dëshirojmë të konfirmojmë se ndalimi është një fakt,” shkruhet në letër.
Gjithsesi, ambasada e Turqisë në Bullgari i tha BIRN më vonë se “po vetëpërmbahet nga një pozicion zyrtar sot”, dhe se ajo as nuk e mohonte dhe as nuk e konfirmonte autenticitetin e letrës së publikuar në mediat bullgare.
Autoritetet turke nuk kanë mbajtur një qëndrim të prerë zyrtare mbi këtë çështje.
“Turqia është një shtet zyrtar dhe nuk ka praktikë diplomatike që të detyrojë një vend të informojë një tjetër paraprakisht mbi vendime të tilla,” komentoi Betina Joteva, zëdhënëse e Ministrisë së Jashtme të Bullgarisë për BIRN.
Dogan dhe Peevski “janë nënshtetas bullgarë dhe ne do të zbulojmë se çfarë po ndodh. Ne jemi angazhuar në komunikime aktive diplomatike,” shtoi ajo.
Në artikullin e Sabah, Dogan akuzohet se ka qenë një ish “agjent sovjetik” i cili së fundmi ka sulmuar edhe anëtarët e tjerë të partisë së tij që patën mbështetur fuqizimin e lidhjeve me Ankaranë.
Ajo rikujtoi se ish udhëheqësi i partisë MRF Lutfi Mestan u rrëzua një ditë para krishtlindjeve pas një fjalimi të mbajtur nga Dogan i cili tha se mbështeta e Mestan për Turqinë pas rrëzimit të avionit rus, tregonte se ai qe “kolona e pestë e Turisë në Bullgari”.
Mestan u shkarkua nga pozicioni i tij në MRF dhe më pas kërkoi strehim politik në ambasadën e Turqisë në Sofie, duke thënë se kishte frikë për sigurinë e tij.
Në janar, kryeministri i Bullgarisë Boyko Borisov konfirmoi se një notë proteste i qe dërguar ambasadorit të Turqisë Suleyman Gokce për shkak të “veprimeve dhe sjelljes së tij” në lidhje me krizën brenda MRF-së.
Ai tha se Gokce dhe diplomatë të tjerë turq qenë përpjekur të lobonin në mbështetje të Mestan, gjë që përbënte ndërhyrje në punët e brendshme të Bullgarisë.
Sabah shkroi se Dogan pati vendosur “një oligarg” në partinë e minoritetit turk në këtë vend, duke iu referuar Peevskit. Gazeta citoi revistën e përjavshme gjermane Der Spiegel, e cila e pati quajtur Peevskin “majën e ajsbergut të korrupsionit në Bullgari”.
Artikulli shton se megjithëse Peevski është një deputet për partinë e turqve, media e tij kishte bërë një fushatë anti-turke, duke sulmuar mes të tjerash edhe ambasadën e Turqisë në Sofie.
Marin Lessenski, drejtor programi në Institutin e Shoqërisë së Hapur në Sofie, tha se sulmi ndaj Dogan dhe Peevski qe një “sinjal i fortë për votuesit e MRF se Ahmed Dogan nuk e gëzon më besimin e Turqisë dhe se ai nuk duhet të mbështetet”.
Ish udhëheqësi i MRF, Mestan, ndërkohë të enjten tha se ai do të nisë një parti të re liberale të quajtur “Demokratët për Përgjegjshmëri, Liri dhe Tolerancë”.