Sektori i teknologjisë së informacionit në Bosnjë po rritet me shpejtësi, thonë kompanitë që punojnë në këtë sektor, por është ende nën potencialin e vet ekonomik.
Sektori i teknologjisë së informacionit në Bosnjë ka filluar të lulëzojë përgjatë viteve të fundit dhe përbën një nga të paktat fusha me rritje në një ekonomi në vështirësi të vazhdueshme, thanë ekspertët e kësaj fushe.
“Bosnja ka ekspertë të jashtëzakonshëm që punojnë në këtë sektor dhe që mund të japin shërbime të cilësisë së lartë në teknologjinë e informacionit,” tha për BIRN Isan Selimovic, drejtor i kompanisë QSS të martën.
Themeluar pak pas lufte në vitin 1997, QSS është bërë kompania kryesore në Europën Juglindore për hostim, zhvillim programesh kompjutetike dhe integrim sistemesh.
Ajo ka zhvilluar partneritete me udhëheqës botërorë të këtij sektori të tillë si Adobe, Microsoft, Symantec dhe Cisco.
Kompania ka 30 të punësuar dhe ka në plan të zgjerohet më tej, thotë Selimovic, duke vërejtur se ky sektor ofron një mundësi të mirë për ekonominë e Bosnjës.
“Këto janë kohë të mira për ne dhe ne kemi në plan të zgjerojmë aktivitetin e të punësojmë rreth 20 persona të tjerë,” tha Selimovic, duke shtuar se të gjithë të punësuarit e tij janë vendës.
Numri i kompanive të teknologjisë së informacionit në Bosnjë po rritet vazhdimisht dhe aktualisht janë rreth 1,400 të tilla që ofrojnë shërbime informimi dhe komunikimi si dhe shërbime programimi, sipas Agjencisë së Promovimit të Investimeve të Huaja në Bosnjë dhe Hercegovinë.
Kjo tendencë nuk është e kufizuar vetëm në Bosnjë por është e zakonshme në të gjithë rajonin e Ballkanit ku një gjeneratë e re të rinjsh të kualifikuar po krijojnë projektet e tyre pasi kanë punuar për disa vite për kompani të huaja që porosisin shërbime në Europën Lindore ku specialistët kushtojnë më lirë se sa në vendet e zhvilluara.
Profesionisti i Teknologjisë së Informacionit Milad Cerkic nga Sarajeva është drejtues i një kompanie të quajtur ATLANTBiH. Ai thotë se kompania e tij është e përqendruar te projektet e veta pasi ka punuar për projekte të huaja për disa vite.
“Ne kemi filluar të krijojmë më shumë projekte tonat, pasi më herët ofronim vetëm shërbime për të huajt,” tha Cerkic për BIRN.
ATLANTBiH u themelua në vitin 2000 dhe ka zhvilluar shërbime të ndryshme, duke filluar nga krijimi i hartave dhe gjeolokacioneve te aplikacione të tilla si Navigator.ba, i cili ndihmon njerëzit të zbulojnë qytetin e Sarajevës.
Përgjatë pak viteve të fundit, sektori i teknologjisë së informacionit në Bosnjë ka parë se si të ardhurat e saj u rritën me 72 për qind, tregon Nina Probic, nga Agjencia për Promovimin e Investimeve për BIRN.
“Ky është sektori me rritjen më të shpejtë në ekonominë e Bosnjës dhe aktualisht ka të ardhura prej 150 milionë markash të konvertueshme (75 milionë euro).
“Të ardhurat e kompanive që operojnë në këtë sektor janë rritur me 60 për qind që nga viti 2010 ndërsa numri i personave që punojnë në këtë sektor është rritur me 67 për qind,” tha Probic për BIRN.
Pavarësisht suksesit të dukshëm, sektori është ende larg të qenit i maturuar dhe Selimovic thotë se nevojiten më shumë specialistë të arsimuar edhe më mirë.
“Sektori po rritet, por në shumë aspekte mbetet ende foshnjë,” thotë ai.
“Shumë kompani nga ky sektor janë në rritje të vazhdueshme për shkak se kompanitë nga jashtë janë duke transferuar punë këtu,” tha ai.
“Bosnja në fund duhet të arrijë në punën ku kapitali i vet njerëzor fillon të krijojë produktet dhe kompanitë e veta në vend që të ofrojë vetëm krahë pune të kualifikuar por të lirë,” tha ai.