Shefi i opozitës kërkon miratimin në seancën e së enjtes të akteve nënligjore për dekriminalizimin, por ultimatumi gjen të papërgatitur mazhorancën dhe rrezikon një ngërç të ri në skenën politike.
Rikthimi i deputetit Armando Prenga në Kuvend, pesë muaj pas arrestimit të tij për veprat penale të plagosjes dhe armëmbajtjes pa leje ka nervozuar opozitën në Shqipëri, e cila paralajmëroi një bojkot të ri të jetës parlamentare në vend.
Kryetari i opozitës, Lulzim Basha i kërkoi të martën mazhorancës që të largojë nga Parlamenti Armando Prengën dhe të miratojë në seancën e së enjtes aktet nënligjore që i japin forcë ligjit të dekriminalizimit-i miratuar me konsensus në dhjetor 2015, por i mbetur ende në letër. Në të kundërt, Basha kërcënoi se grupi parlamentar i opozitës “do të pamundësojë zhvillimet parlamentare”.
Bashkë me Prengën, Basha kërkoi edhe largimin e deputetëve socialistë Koço Kokëdhima, Valentina Leskaj dhe Rakip Suli, që sipas tij kanë përfituar fonde publike në kundërshtim me ligjin. Ai akuzoi kryeministrin Edi Rama se po pengon zbatimin e ligjit dhe se po vazhdon bashkëpunimin me krimin e organizuar.
“…Regjimi ka strehuar kriminelë në kupolën e tij, njerëz si Armando Prenga që plagosi dhe derdhi gjak dhe në vend që të mbahet në burg, shpërblehet dhe kthehet në Parlament nga Edi Rama,” tha Basha.
Largimi i kriminelëve nga politika ka qenë një kalë beteje për Partinë Demokratike gjatë këtij mandati në opozitë, ku pas mbështetjes edhe të faktorit ndërkombëtar arriti të diktonte miratimin e një ligji që largon nga parlamenti, administrata dhe pushteti vendor personat e dënuar me vendim të shkallës së parë. Ligji parashikon gjithashtu edhe largimin e funksionarëve ndaj të cilëve ka një masë sigurimi apo urdhër-arrest.
Armando Prenga është vetëm njëri prej deputetëve të mazhorancës nën shenjestrën e opozitës, ndërkohë që arrestimi i tij në shtator 2015 si pjesmarrës në një përleshje të armatosur ku mbetën të plagosur shtatë persona i shërbeu kauzës së miratimit të shpejtë të ligjit.
Rasti Prenga u shfry megjithatë në gjykatë, ku deputeti u lirua nga burgu në dhjetor dhe iu hoq masa e arrestit shtëpiak në shkurt 2016. Ky vendim i Gjykatës së Lartë i hapi rrugën rikthimit të tij në Kuvend, duke ashpërsuar aksionin politik të opozitës.
Në një deklaratë për Top Channel, Prenga e cilësoi “lajthitje” kërkesën e opozitës për largimin e tij nga Parlamenti dhe i kërkoi asaj të mos e identifikojë më si deputet të Partisë Socialiste-ai u përjashtua nga partia pas arrestimit.
Ai pretendoi gjithashtu se emri i tij nuk duhet të lidhet me procesin e dekriminalizimit, pasi zotëron certifikatë sigurie dhe sipas tij, i ka kaluar filtrat e kontrollit.
“Për mua nuk ka ende një vendim gjykate. Duhet të presim vendimin e gjykatës. Por opozita kot më identifikon si deputet të Partisë Socialiste, pasi unë jam i përjashtuar nga ajo parti,” tha Prenga.
Paralajmërimi i një bojkoti të mundshëm nga shefi i opozitës, Basha u parapri nga një kërkesë zyrtare që grupi parlamentar i Partisë Demokratike dorëzoi në Kuvend. Përmes saj, PD akuzoi Ramën se po pengon dekriminalizimin dhe kërkoi futjen me urgjencë në kalendar dhe miratimin në seancën e së enjtes të akteve nënligjore.
Mazhoranca nuk ka komentuar ultimatumin e opozitës, por përfaqësues të saj thanë për BIRN se aktet nënligjore do të miratohen brenda afateve të përcaktuara në ligjin për dekriminalizimin.
I miratuar më 17 dhjetor 2015 me konsensus, ligji parashikon një periudhë tranzitore 2 mujore për hartimin e akteve nënligjore. Dekriminalizimi ka hyrë në fuqi më 6 janar dhe ky afat skadon më 6 mars 2016.
Ermonela Felaj-ministre e Shtetit për Marrëdhëniet me Parlamentin i tha BIRN se sekretariati teknik, i ngritur pranë Kuvendit po punon ende për hartimin e akteve nënligjore dhe se ajo beson se ky proces do të përfundojë brenda 6 marsit, i cili shënon edhe fundin e afatit 2 mujor të përcaktuar në ligj.
“Ky sekretariat ka punuar normalisht me pjesmarrjen e të dyja palëve. Në dijeninë time nuk ka pasur probleme nuk ka asnjë arsye për vonesa tej afateve ligjore,” tha Felaj.
Përplasja e qëndrimeve mes dy palëve për ligjin e dekriminalizimit pritet të dominojë axhendën e debatit parlamentar të së enjtes në Tiranë. Megjithatë, paralajmërimi i opozitës për një bojkot të mundshëm të jetës parlamentare zbeh shpresat për një konsensus të mundshëm për reformën në drejtësi-nismën më të rëndësishme ligjore që pritet t’i dorëzohet Kuvendit në mars.
Ligji i dekriminalizimit dhe reforma në drejtësi konsiderohen dy sfidat kryesore për Shqipërinë, të cilat përcaktojnë edhe rrugëtimin e mëtejshëm të vendit drejt integrimit në Bashkimin Europian.
Suksesi i tyre mbetet në dorë të konsensusit, por tensionimi i fundit mes palëve projekton një krizë të re në skenën politike shqiptare.
