Organizata fanatike të krahut të djathtë në Serbi mbajtën një protestë anti-ANTO të premten dhe kërkuan referendum për hyrjen ose jo të vendit në aleancën ushtarake të perëndimit.
Dy organizata të krahut të djathtë, Zavetnici (Mbajtësit e Betimit) dhe Lëvizja Patriotike e Serbisë drejtuar nga gjenerali i policisë tashmë në pension Bratislav Dikiç, mbajtën një protestë anti-NATO në sheshin Mbreti Milan në Nis të premten, duke kërkuar një referendum mbi anëtarësimin në NATO.
Disa nga protestuesit mbanin një pankartë me mbishkrimin “Rezistencë ndaj pushtimit”.
Shkak për protestën ishte miratimi së fundmi nga Serbia i marrëveshjes për të bashkëpunuar me Organizatën Mbështetje dhe Prokurim (NSPO) të NATO-s.
Kundërshtarët e marrëveshjes pretendojnë se ajo vë në rrezik sovranitetin e Serbisë dhe përfaqëson një hap më afër për anëtarësimin në aleancë e cila bombardoi vendin në vitin 1999.
Milica Djurdjeviç, lider i Zavetnici, i tha BIRN përpara protestës se bashkëpunimi me NSPO është mungesë respekti ndaj popullit serb dhe veçanërisht veteranëve të luftës prej bombardimeve të NATO-s.
“Kjo marrëveshje vë në rrezik sovranitetin serb dhe ne po kërkojmë një referendum në lidhje me të,” tha Djurdjeviç, duke premtuar se disa veteranë të luftës do të protestonin gjithashtu në tubim.
Zavetnici dhe lëvizja nacionaliste ekstreme Obraz organizuan një protestë anti-NATO në Beograd më 20 janar kur disa mijëra njerëz protestuan përpara presidencës mbi ratifikimin e marrëveshjes me NSPO.
Protestuesit mbanin flamuj serbë, foto të Vladimir Putinit dhe pankarta anti-NATO, ata bërtisnin “Kosova është Serbi” dhe kënduan këngë patriotike.
Miratimi i marrëveshjes NSPO nxiti debat të fortë në vend nëse pengon doktrinën serbe të neutralitetit ushtarak dhe nëse e afron vendin me NATO-n.
Komiteti i Mbrojtjes dhe Punëve të Brendshme i parlamentit e miratoi nënshkrimin e marrëveshjes së mbështetjes logjistike me NATO-n më 13 shkurt.
Opinioni publik rreth NATO-s është shumë i ndarë në Serbi që kur aleanca ndërmori sulme ajrore kundër ish-Jugosllavisë gjatë fushatës 78-ditore të bombardimit në 1999, duke e detyruar Serbinë të tërhiqej nga Kosova, që shpalli pavarësinë.
Pavarësisht neutralitetit ushtarak të shpallur në 2007, Beogradi është tashmë anëtar i Partneritetit për Paqen, program pranë NATO.
Djurdjevic tha pas protestës në Nis se Zavetnici do të organizojë disa protesta të tjera në qytete të ndryshme të Serbisë, duke shtuar edhe “një protestë të madhe në Beograd” që planifikohet për 27 mars.
