Spitali nuk po u siguron pacientëve të sëmurë me kancer ilaçet e domosdoshme për kurimin e tyre, ndërsa sigurimi i tyre në mënyra të tjera mbetet i kushtueshëm dhe i pasigurt, thonë familjarët.
Familjarë të pacientëve të sëmurë me kancer dhe organizata për çështjet e shëndetësisë “Together for Life” u mblodhën të martën përpara pavionit të Onkologjikut në Qendrën Spitalore Universitare Nënë Tereza për të denoncuar mungesën e ilaçeve që spitali duhet t’u sigurojë pacientëve.
Ilaçet e pacientëve të sëmurë me kancer sipas ligjit duhet të shpërndahen falas nga spitali për pacientët.
“Vajza ime është në fazën e katërt të kancerit dhe ndonëse mjekët janë përpjekur të bëjnë më të mirën, mungesa e ilaçeve nga spitali po pengon kurimin e saj,” tha për BIRN, Nusret Dervishi, babai i një pacienteje 22-vjeçare të sëmurë.
“Ciklin e dytë të mjekimit jemi detyruar ta blejmë vetë në mënyrë private dhe kostoja e tij prej 4 milionë e 200 mijë lekësh të vjetra ka rënduar mbi gjendjen e vështirë ekonomike të familjes sonë” shtoi ai.
“Mjekët thonë se sëmundja e vajzës sime ka avancuar dhe se ajo ka nevojë për transplant të palcës, që mund të sigurohet vetëm jashtë shtetit,” bëri apel Nusret Dervishi, babai i Ornelës së sëmurë nga kanceri.
Shoqata Together for Life denoncoi se mjekët lëshojnë receta jozyrtare ilaçesh, ndërsa pranojnë se ato nuk mund të sigurohen në spital.
“Pavarësisht se spitali nuk u siguron pacientëve me kancer ilaçet e domosdoshme, farmacitë e shumta përreth spitalit i kanë këto ilaçe dhe ia shesin shtrenjtë pacientëve,” tha Eglantina Bardhi, nga organizata Together for Life.
“Ilaçet nga farmacitë nuk përmbajnë pullën e kontrollit dhe kjo nënkupton se ato janë kontrabandë dhe të pasigurta për pacientët,” shtoi ajo.
Familjarët dhe organizata i bënë thirrje Ministrisë së Shëndetësisë të sigurojë menjëherë ilaçet e nevojshme për pacientët e Onkologjikut, pasi janë jetësore për kurimin e të sëmurëve me kancer.
Të tjerë familjarë që kërkuan të mbeten anonimë për shkak se kurimi i pacientit vazhdon, i thanë BIRN se ata i kanë siguruar ilaçet si Avastinë dhe Taxol në depo farmaceutike në Shqipëri për çmime që variojnë nga 300 mijë lekë të vjetra në 700 euro.
