Në një përkujtimore të luftëtarëve të kohës së luftës në Kosovë, i biri i komandantit të vrarë Adem Jashari i bëri thirrje krerëve politikë të tregojnë pjekuri dhe të kapërcejnë krizën politike në vend.
Lulzim Jashari, djali i ish-komandantit të UÇK-së, Adem Jashari, i cili shihet si një hero lufte nga ana e shqiptarëve të Kosovës, tha në një ceremoni me rastin e 17-vjetorit të vrasjes së babait të tij nga forcat serbe se liderët politikë të Kosovës duhet të tregojnë unitet në mes të krizës që ka ndarë vendin.
“Ne po themi me keqardhje se 17 vjet pas përfundimit të luftës, për Kosovën janë hapur plagë të panevojshme,” tha Jashari.
Ai po i referohej krizës së vazhdueshme politike midis koalicionit qeverisës dhe partive opozitare, të cilat kanë disa muaj që bllokojnë punën në parlament, në shenjë proteste për dy marrëveshje të diskutueshme me Serbinë dhe Malin e Zi.
Ai kritikoi gjithashtu grindjet e fundit publike nga disa politikanë të Kosovës të cilët ishin miq të ngushtë të Adem Jasharit.
“Nuk është koha për lavdi apo krekosje. Nuk është koha për të marrë nga Kosova, por për t’i dhënë asaj,” tha ai.
Ai po i referohej deputetit të Lëvizjes Vetëvendosja, Rexhep Selimi, dhe ambasadorit të Kosovës në Tiranë, Ramiz Lladrovci, të dy ish-anëtarë të UÇK-së, të cilët kanë shkëmbyer akuza të ashpra në lidhje me aktivitetet e njëri-tjetrit gjatë kohës së luftës në mes të debatit të nxehtë mes opozitës dhe qeverisë.
Jashari i bëri këto komente në eventin tre ditor të organizuar për të nderuar disa luftëtarë të Kosovës.
Epopeja e Ushtrisë Çlirimtare të Kosovës, siç ajo njihet, fillon çdo vit më 5 mars duke shënuar vdekjen e Adem Jasharit dhe të rreth 40 anëtarë të familjes së tij, të cilët u vranë nga forcat ushtarake serbe pas rrethimit të shtëpisë së tyre në fshatin Prekaz në fillim të konfliktit të vitit 1998-1999.
Një komandant i operacioneve të UÇK-së në zonën e Drenicës, Jashari ka marrë pjesë në një sërë sulmesh ndaj forcave jugosllave para se të vritej.
Jashari konsiderohet nga shumica e shqiptarëve të Kosovës si një hero kombëtar dhe komandanti i parë i UÇK-së, e cila u demilitarizua pas përfundimit të luftës në vitin 1999.
Forcat e Sigurisë së Kosovës organizuan një paradë ditën e parë të Epopesë të shtunën në kazermat ushtarake në Prishtinë.
Epopeja përfundon të hënën me ndezjen e zjarreve të mëdha në Prekaz.
