Prokuroria dyshon se paratë e drogës ndërtuan hotelin pesëkatësh në zonën e “Ujit të Ftohtë” në Vlorë, dyshim i ngritur gjatë hetimeve mbi atentatin që i mori jetën Isuf Brahimajt më 2014. Ndërkohë, vrasja ka mbetur pa autor.
Prokuroria e Përgjithshme njoftoi sot se ka urdhëruar sekuestrimin e një ndërtese pesëkatëshe në zonën e Ujit të Ftohtë në Vlorë, pasi hetimet mbi një vrasje me minë me telekomandë krijuan dyshimin se objekti i sekuestruar është ndërtuar me para të fituara në aktivitete kriminale në Itali dhe Hollandë. Kostoja e objektit të sekuestruar vlerësohet në 100 milionë lekë, (rreth 715 mijë euro).
Në gushtin e vitit 2014, Isuf Brahimaj, u vra në një atentat me minë të shpërthyer me telekomandë. Ai dhe i vëllai i tij i kishin shpëtuar një atentati të ngjashëm më herët.
Prokuroria e hetoi ngjarjen e atentatit të ndodhur në mëngjesin e 28 gushtit 2015, autorët e të cilit nuk janë identifikuar, por gjatë hetimeve, krijoi dyshimin se një objekt ndërtimor prej 3,090 metra katrore të ndërtuar mbi një truall prej 2,500 metrash katrore, nën pronësinë e babait të viktimës, Shpëtim Brahimaj, mund të jetë krijuar me paratë e fituara nga aktivitetet e paligjshme të djemve të tij.
Për rrjedhojë, Prokuroria e Krime të Rënda ka kërkuar të mërkurën konfiskimin e pasurisë së tij, pasi dyshohet se është vënë nëpërmjet veprimtarisë kriminale të zhvilluar në Itali dhe Hollandë.
“Pasuritë janë përfituar pas përfshirjes së personave të hetuar Ermal Bajrami alias Bashkim Brahimaj dhe vëllai i tij, i ndjeri Isuf Koka alias Isuf Brahimaj në veprimtari kriminale, veprimtari kriminale që daton që në vitin 1994 për të ndjerin Isuf Brahimaj dhe në vitin 2004 për Ermal Bajramin,” thuhet në njoftimin e prokurorisë.
“Këto pasuri nuk i përgjigjen nivelit të të ardhurave të të dyshuarve dhe familjarëve të tyre. […] Pasuritë janë në zotërim të drejtpërdrejtë të personave të hetuar të cilët pavarësisht faktit se dokumentet i kanë regjistruar ne emër të babait të tyre Shpëtim Brahimaj, rezulton se objekti i ndërtuar është fryt i investimeve të djemve të tij Ermal Bajrami alias Bashkim Brahimaj dhe i ndjeri Isuf Koka alias Isuf Brahimaj,” vijon më tej deklarata e prokurorisë. (kliko këtu për të parë deklaratën e plotë).
Në vijim të hetimeve për atentatin ndaj tij, një ndër pistat e ngritura nga autoritetet hetimore ishin edhe përplasjet e mundshme për trafikun e lëndëve narkotike, pasi Isuf Brahimaj (Kokaj) ishte dënuar nga autoritetet italiane dhe hollandeze për trafik ndërkombëtar lëndësh narkotike.
Në kuadër të veprimeve verifikuese, u konstatua se familja Brahimaj, më konkretisht babai i viktimës, shtetasi Shpëtim Brahimaj, kishte legalizuar në emër të tij një ndërtesë 5-katëshe të papërfunduar, e cila ishte destinuar për shërbime hotelerie.
Shqipëria vlerësohet në raportet ndërkombëtare si një destinacion për pastrimin e pasurive të krijuara nga aktivitete kriminale në vende të tjera, zakonisht vende të Bashkimit Europian. Autoritetet shqiptare janë kritikuar shpesh në të shkuarën për moskonfiskimin e pasurive të dyshimta.
Raporti i fundit i Progresit të Bashkimit Europian thotë se paratë e krimit kanë infiltruar sektorin publik dhe privat dhe se ky është një shqetësim serioz.
“Hetimet financiare nuk kanë filluar ende në mënyrë sistematike në rastet e korrupsionit. Ka shumë pak raste të konfiskimit të aseteve në çështjet e korrupsionit. Infiltrimi i sektorëve publikë dhe privatë nga krimi i organizuar – lehtësuar kjo nga korrupsioni – vijon të jetë një problem madhor dhe shqetësues dhe duht të trajtohet në mënyrë urgjente.”
“Numri i dënimeve finale është shumë i ulët në krahasim me vlerën e tregut rajonal dhe vendës të drogës. Hetimet financiare mbeten të nënpërdorura dhe niveli i konfiskimit të aseteve është i ulët,” vijon më tej raporti.