Shqetësimet se trafikantët e njerëzve mund të riaktivizojnë “itinerarin e Adriatikut” nga Shqipëria në Itali i ka nxitur autoritetet e dy vendeve të punojnë së bashku për të parandaluar këtë situatë.
Foto: LSA / GENT SHKULLAKU
Policia italiane do të ndihmojë homologët në Shqipëri për të ndaluar një fluks të mundshëm refugjatësh pasi vendet në të ashtuquajturin itinerar të Ballkanit po mbyllin kufijtë e tyre.
Të shqetësuar rreth devijimit të itinerarit të refugjatëve për në Europën Perëndimore përmes Shqipërisë dhe Detit Adriatik, autoritetet italiane në Pulia kanë vendosur të investojnë në parandalimin e një situate të tillë.
Ministria e Brendshme shqiptare i tha BIRN se ekspertët nga ministritë e dy vendeve po punojnë në një memorandum rreth caktimit të patrullave të përbashkëta mes shumë masave të tjera.
Italia do të ndihmojë në sigurimin e kufirit detar shqiptar që të parandalohet një trafikim i organizuar i njerëzve në Itali.
Një tjetër pikë e bashkëpunimit pritet të jetë shkëmbimi i informacionit, që reflekton frikën se elementë terroristë mund të futen fshehurazi në Shqipëri dhe të kalojnë në Itali si migrantë dhe refugjatë.
Ideja e bashkëpunimit lindi në një takim në Romë më 4 mars mes ministrave shqiptarë dhe italianë, Saimir Tahiri dhe Angelino Alfano.
Shqipëria po përpiqet tashmë të shmangë një fluks të mundshëm refugjatësh – por rreth 45,000 njerëz kanë ngecur në Greqinë fqinje, pas mbylljes së rrugës nëpër Maqedoni dhe Serbi.
Genc Merepeza, drejtor i Policisë Kufitare Shqiptare i tha BIRN se Shqipërisë i mungon kapaciteti për t’u përballur me një fluks të madh refugjatësh.
“Ne nuk do t’ia hapim dyert sepse nuk kemi kapacitet për këtë,” tha ai.
Asnjë kamp refugjatësh nuk është përgatitur për një fluks të mundshëm nga Greqia.
